​ប៉ា​គី​ស្ថាន៖ ជនជាតិ​អា​ហ្វ​ហ្គា​នី​ស្ថាន​ដែល​រត់គេច ​ពី​ភាព​ចលាចល​នៅ​ក្នុង​ប្រទេស​របស់​ពួកគេ ​បាន​បន្ត​ឆ្លង​ព្រំដែន​ចូល​ប្រទេស​ប៉ា​គី​ស្ថាន​កាលពី​ថ្ងៃ​ព្រហស្បតិ៍​។​ ​ច្រក​ព្រំដែន​សំខាន់​ពីរ​របស់​អា​ហ្វ​ហ្គា​នី​ស្ថាន​ជាមួយ​ប៉ា​គី​ស្ថាន​គឺ Torkham នៅ​ជិត​ទីក្រុង Jalalabad និង Chaman ក្បែរ​ទីក្រុង Spin Boldak ក្នុង​ប្រទេស​អា​ហ្វ​ហ្គា​នី​ស្ថាន ឥឡូវនេះ​បាន​បើក​ដំណើរការ​សម្រាប់​ការ​ធ្វើ​ពាណិជ្ជកម្ម​ហើយ​។

​យោង​តាម​រដ្ឋមន្ត្រី​ក្រសួង​មហាផ្ទៃ​ប៉ា​គី​ស្ថាន ​លោក Sheikh Rashid Ahmed បាន​ឱ្យ​ដឹង​ថា ​ឥឡូវនេះ​រថយន្ត​ដឹកទំនិញ​រាប់​រយ​គ្រឿង​បាន​ឆ្លងកាត់​ បន្ទាប់ពី​ជាប់​គាំង​នៅ​ព្រំដែន​អស់​ជាច្រើន​ថ្ងៃ​។​ ​ទោះ​យ៉ាង​ណា ពាណិជ្ជករ​នៅតែ​បារម្ភ​ពី​អសន្តិសុខ​នៅ​តាម​ដងផ្លូវ និង​ភាព​ច្របូកច្របល់​ចំពោះ​ការ​បង់​ពន្ធ ដែល​អាច​ជំរុញ​ឱ្យ​ពួកគេ​ត្រូវ​លក់ទំនិញ​ក្នុង​តម្លៃ​ខ្ពស់​ជាង​។​ ​ក្រុម​បះបោរ​បាន​វាយលុក​ទូទាំង​ប្រទេស​ ដណ្តើម​បាន​ទីក្រុង​ធំ​ៗទាំងអស់​ក្នុង​រយៈពេល​តែ​ប៉ុន្មាន​ថ្ងៃ​ប៉ុណ្ណោះ ​ខណៈ​ដែល​កងកម្លាំង​សន្តិសុខ​អា​ហ្វ​ហ្គា​នី​ស្ថាន ​ទទួល​បាន​ការ​បណ្ដុះបណ្ដាល​ និង​បំពាក់​ដោយ​អាមេរិក ​និង​សម្ព័ន្ធមិត្ត​បាន​រត់​អស់​។​

​រហូតមកដល់​ពេលនេះ​ក្រុម​តា​លី​បង់ ​មិនបាន​ផ្តល់​ព័ត៌មាន​ជាក់លាក់​អំពី​របៀប​ដែល​ពួកគេ ​នឹង​ដឹកនាំប្រទេស​នោះ​ទេ ក្រៅពី​និយាយ​ថា ​ពួកគេ​នឹង​ត្រូវ​ដឹកនាំ​ក្រោម​ច្បាប់ Shariah ឬ​ច្បាប់​អ៊ីស្លាម​។​ ​ជនជាតិ​អា​ហ្វ​ហ្គា​នី​ស្ថាន​ជាច្រើន​បាន​លាក់ខ្លួន​នៅ​ក្នុង​ផ្ទះ​ ឬ​ព្យាយាម​ភៀសខ្លួន​ចេញពី​ប្រទេស​ដោយ​ខ្លាច​ការរំលោភ​បំពាន​ ពី​សំណាក់​អង្គការ​ក្រុម​សកម្ម​ប្រយុទ្ធ​ដែល​បាន​គ្រប់គ្រង​យ៉ាង​តឹងរ៉ឹង​៕

អត្ថបទ៖ សុខមាន