អ៊ីស្រាអែល បានវាយលុកតំបន់លំនៅឋានមួយក្នុងទីក្រុងហ្កាហ្សា កាលពីថ្ងៃព្រហស្បតិ៍ (២៧ មិថុនា) ដោយបញ្ជាឱ្យពលរដ្ឋប៉ាឡេស្ទីនផ្លាស់ទីទៅភាគខាងត្បូង ខណៈដែលរថក្រោះបានសម្រុកចូលតំបន់នោះ និងការវាយប្រហារដោយគ្រាប់បែកលើទីក្រុង រ៉ាហ្វា (Rafah) ភាគខាងត្បូង លាន់លឺឡើងនៅក្នុងអ្វីដែលអ៊ីស្រាអែល និយាយថាជាដំណាក់កាលចុងក្រោយនៃប្រតិបត្តិការប្រឆាំងនឹងពួកសកម្មប្រយុទ្ធហាម៉ាស នៅទីនោះ។

អ្នកស្រុកនៃតំបន់ ស្ហេចាអៀ (Shejaia) ក្នុងទីក្រុងហ្កាហ្សា បាននិយាយថា ពួកគេមានការភ្ញាក់ផ្អើលចំពោះសំឡេងរថក្រោះខិតចូលមកជិត និងការបាញ់ប្រហារនៅពេលរសៀល ដោយយានដ្រូនក៏បានវាយប្រហារបន្ទាប់ពីការទម្លាក់គ្រាប់បែកពេញមួយយប់នៃទីក្រុង ដែលអ៊ីស្រាអែលបានវាយលុកលើកដំបូងនៅដើមសង្រ្គាម។

នៅល្ងាចថ្ងៃព្រហស្បតិ៍ សេវាសង្គ្រោះបន្ទាន់ស៊ីវិលប៉ាឡេស្ទីនបាននិយាយថា ការវាយប្រហាររបស់យោធាអ៊ីស្រាអែល បានសម្លាប់មនុស្សយ៉ាងហោចណាស់ប្រាំពីរនាក់នៅតំបន់ ស្ហេចាអៀ មកទល់ពេលនេះ។ អង្គការនេះបាននិយាយថា អ្នកស្លាប់ និងរបួសកាន់តែច្រើនត្រូវបានគេភ័យខ្លាចថាស្ថិតនៅក្រោមគំនរបាក់បែកដែលក្រុមជួយសង្គ្រោះមិនអាចទៅដល់បាន។

វីដេអូដែលទទួលបានដោយសារព័ត៌មានរ៉យទ័រ បានបង្ហាញស្ត្រី បុរស និងកុមារ កាន់បង្វិចខោអាវ និងអាហារ ខណៈដែលពួកគេរត់តាមដងផ្លូវបន្ទាប់ពីការវាយឆ្មក់បានចាប់ផ្តើម ហើយអ្នកខ្លះបីកុមាររងរបួស ខ្លះមានហូរឈាមនៅដៃ ខណៈពួកគេរត់គេចខ្លួន។ អ៊ីស្រាអែល បានចោទពួកសកម្មប្រយុទ្ធថាបានលាក់ខ្លួនក្នុងចំណោមជនស៊ីវិល ហើយនិយាយថា ខ្លួនបានព្រមានជនភៀសខ្លួនឱ្យគេចចេញពីផ្លូវនៃប្រតិបត្តិការប្រឆាំងនឹងក្រុមអ្នកប្រយុទ្ធ៕