ការវិភាគពីវិទ្យាស្ថានស្រាវជ្រាវបានរកឃើញនៅថ្ងៃសុក្រ (២៨ មិថុនា) នេះថា ចំនួនថ្ងៃដែលសីតុណ្ហភាពឈានដល់កម្រិត ៣៥ អង្សាសេ នៅរដ្ឋធានីធំៗបំផុតចំនួន ២០ របស់ពិភពលោក រាប់ចាប់ពីទីក្រុងញូវដេលី ទៅទីក្រុងហ្សាការតា រហូតដល់ទីក្រុងប៊ុយណូស៊ែរ បានកើនឡើង ៥២ ភាគរយក្នុងរយៈពេល ៣ ទសវត្សរ៍កន្លងមកនេះ។

មនុស្សជាង ៣០០ លាននាក់រស់នៅក្នុងទីក្រុងចំនួន ២០ ដែលមានប្រជាជនច្រើនជាងគេបំផុតរបស់ពិភពលោក ជាទីដែលពួកគេងាយរងគ្រោះនឹងកំណើនសីតុណ្ហភាពបណ្តាលមកពីបម្រែបម្រួលអាកាសធាតុ ដោយសារតែកម្ដៅចេញពីដី ហើយអគារបានស្រូបយក និងរក្សាឱ្យមានកម្ដៅក្ដៅខ្លាំង។

រដ្ឋធានីនានា រួមទាំងទីក្រុងដេលី ដាកា និងម៉ានីល នៅឆ្នាំនេះបានញាំញីដោយរលកកម្ដៅដ៏គ្រោះថ្នាក់ រួចទៅហើយ ដែលនាំទៅដល់ការស្លាប់ជាច្រើនទាក់ទងនឹងកម្ដៅ និងការបិទសាលារៀន។ ទីក្រុងដេលី តែមួយបានកត់ត្រារលកកម្ដៅដ៏វែងបំផុត និងធ្ងន់ធ្ងរបំផុតរបស់ខ្លួនក្នុងរយៈពេល ៧៤ ឆ្នាំ ដោយបានចុះបញ្ជីរយៈពេល ៣៩ ថ្ងៃជាប់ៗគ្នាជាមួយនឹងសីតុណ្ហភាពអតិបរមានៅត្រឹម ឬលើសពី ៤០ អង្សាសេ ចាប់ពីថ្ងៃទី១៤ ខែឧសភា ដល់ថ្ងៃទី២១ ខែមិថុនា នេះបើយោងតាមទិន្នន័យស្ថានីយ៍អាកាសធាតុ។

ឥឡូវនេះ ការវិភាគដោយវិទ្យាស្ថានអន្តរជាតិសម្រាប់បរិស្ថាន និងការអភិវឌ្ឍន៍ (IIED) ដែលមានមូលដ្ឋាននៅទីក្រុងឡុងដ៍្រ កំណត់បរិមាណការគំរាមកំហែងនៃកម្ដៅខ្លាំងនៅក្នុងមជ្ឈមណ្ឌលទីក្រុងធំៗមួយចំនួនរបស់ពិភពលោក។ ដោយប្រើទិន្នន័យសីតុណ្ហភាពលើបរិកាសផែនដីពីស្ថានីយ៍អាកាសធាតុនៃអាកាសយានដ្ឋាន ក្រុមអ្នកស្រាវជ្រាវបានរកឃើញថា ពីឆ្នាំ២០១៤ ដល់ឆ្នាំ២០២៣ មានជិត ៦.៥០០ ថ្ងៃជាប់ៗគ្នា ឬរំលងគ្នាបន្តិចបន្តួច នៅពេលដែលទីក្រុងមួយក្នុងចំណោមទីក្រុងទាំង ២០ នោះឡើងដល់សីតុណ្ហភាព ៣៥ អង្សាសេ ឬខ្ពស់ជាងនេះ៕