ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ប្រទេស​បារាំង ចង់សហការរៀបចំវេទិកាជំនួញលើកទី៣ របស់អង្គការសហប្រជាជាតិ (UNOC3) នៅ​កម្ពុជា ​ដែលអាចនឹងមានការចូលរួមច្រើនពីបណ្តាប្រទេសនានា។

ឯកឧត្តមរដ្ឋមន្រ្តី ឌិត ទីណា ក្នុងជំនួបការងារជាមួយឯកឧត្តម Jacques PELLET អគ្គ​រដ្ឋ​ទូត​សាធារណ​រដ្ឋបារាំងប្រចាំនៅកម្ពុជា កាលពីរសៀលថ្ងៃទី២៧ មិថុនា ឆ្នាំ២០២៤នេះ បានបង្ហាញ​នូវ​សុទិដ្ឋិនិយម ដែលប្រទេសបារាំងចង់សហការកម្មវិធីនេះ ផ្អែកលើបទ​ពិសោធន៍​កម្ពុជា​លើ​ការ​រៀបចំ​វេទិកាអន្តរជាតិកន្លងមក ជាពិសេសសហប្រតិបត្តិការល្អរវាងប្រទេសទាំងពីរ កម្ពុជា-បារាំង និង​សមិទ្ធផលជាច្រើនដែលសម្រេចបានជាមួយគ្នា។ ឯកឧត្តម បានគូសបញ្ជាក់ថា វេទិកានេះ ជា​ឱកាស​ដែល​កម្ពុជាអាចពន្យល់អំពីគោលនយោបាយអាទិភាពវិស័យកសិកម្មរបស់ខ្លួន ដោយផ្តោត​លើ​ការ​ធានាឱ្យបាននូវសន្តិសុខស្បៀង ធ្វើឱ្យមាននិរន្តរភាពសេដ្ឋកិច្ចនិងបរិស្ថាន ការជំរុញ​ការ​ប្រើប្រាស់​វត្ថុ​ធាតុដើមសម្រាប់ឧស្សាហកម្ម ការបង្កើតឱ្យមាន​តម្លៃ​បន្ថែម​ខ្ពស់​សម្រាប់​ផលិត​ផល​កសិកម្ម​ និងមានការងារធ្វើពេញមួយឆ្នាំ។

លើសពីនេះ​ទៀត ឯកឧត្តមរដ្ឋមន្ត្រី បានបញ្ជាក់បន្ថែមអំពីគោលនយោបាយអាទិភាព ដែលបាន​និង​កំពុង​ជំរុញសហគមន៍កសិកម្មទំនើប ដែលមានសមត្ថភាពក្នុងការផលិតក្នុងទ្រង់ទ្រាយធំ ទុន​ផលិតទាប មានស្ថិរភាពតម្លៃ ផ្តល់ផលចំណេញដល់កសិកម្ម ដោយស្មើភាព។ ទាក់​ទង​នឹង​ការងារ​នេះ ឯកឧត្តម ស្វាគមន៍វិស័យឯកជន និងដៃគូអភិវឌ្ឍន៍ ក្នុង​ការ​ផ្តល់​កម្ចី​ដែល​មាន​អត្រា​ការ​ប្រាក់​ទាប ដើម្បីចូលរួមជំរុញសហគមន៍កសិកម្មទំនើបថ្មីនេះ។

បើតាម​ឯកឧត្តម ឌិត ទីណា និរន្តរភាពសហគមន៍កសិកម្ម គឺយើងជាអ្នកបង្កើតវាឡើង ដោយ​មាន​ការ​គាំទ្រពីក្រសួងកសិកម្ម និងដៃគូអភិវឌ្ឍន៍។ ឯកឧត្តម បានបញ្ជាក់បន្ថែមថា ជា​គោល​ដៅ​គឺ​ធ្វើ​ការ​ជំរុញកសិ-ពាណិជ្ជកម្ម និងធ្វើឱ្យមានតុល្យភាពរវាងការអភិវឌ្ឍ និងការអភិរក្ស៕ អត្ថបទ ឈិត បូរ៉ាវី