ក្នុងឱកាសគំរបខួប៧៣ឆ្នាំ នៃការបង្កើតគណបក្សប្រជាជនកម្ពុជា កម្មករ កម្មការិនី និងភាគី​សហជីព បានលើកឡើងពីការមើលឃើញរបស់គណបក្សមួយនេះ ក្នុងការ​ដឹកនាំសង្គមជាតិ​ឲ្យ​បន្តឈានទៅមុខលើមាគ៌ាសន្តិភាព ជាពិសេសក្នុងវិស័យឧស្សាហកម្មកាត់ដេរ ដែលផ្តល់​ឱកាស​ការងារជាច្រើនដល់ប្រជាពលរដ្ឋ និងមានប្រាក់ចំណូលទៀងទាត់ដើម្បីផ្គត់ផ្គង់គ្រួសារ។

លោក សុទ្ធ សំអុល ប្រធានសហជីពនៅរោងចក្រកាត់ដេរ ម៉ាកាឡូត សាខាទី៣ ស្ថិតនៅសួន​ឧស្សាហ​កម្មវឌ្ឍនៈ១ ខណ្ឌពោធិ៍សែនជ័យ រាជធានីភ្នំពេញ បានលើកឡើងថា សម្រាប់​វិស័យ​កាត់ដេរ ពី១ឆ្នាំទៅ១ឆ្នាំ និងពី ១អាណត្តិទៅ១អាណត្តិ រដ្ឋាភិបាលក្រោមការដឹកនាំ​របស់​គណបក្សប្រជាជនកម្ពុជា កត់សម្គាល់ឃើញថា បានធ្វើឲ្យប្រទេសមានការអភិវឌ្ឍន៍ជាលំដាប់ ជាពិសេស​ការទាក់ទាញអ្នកវិនិយោគឲ្យបើករោងចក្រក្នុងស្រុក ធ្វើឲ្យកម្មករ កម្មការនី មាន​ការងារធ្វើជាបន្តបន្ទាប់។ លោកក៏មិនភ្លេចផងដែរនូវគុណបំណាច់របស់សម្តេចតេជោ ប្រធាន​គណបក្សប្រជាជនកម្ពុជា និងជាអតីតនាយករដ្ឋមន្រ្តីដែលបាន​ដឹកនាំប្រទេសជាតិ​ឱ្យមាន​សុខសន្តិភាពធ្វើឲ្យប្រជាពលរដ្ឋមានការងារធ្វើ និងអាចប្រកបមុខរបររកស៊ីដោយសន្ដិភាព។

ពាក់ព័ន្ធ​ការដឹកនាំរបស់គណបក្សប្រជាជនកម្ពុជា កម្មករមួយរូបឈ្មោះ ជួន គឹមសាន បាន​លើក​ឡើងថា គណបក្សប្រជាជនកម្ពុជា គឺបានដើរតួនាទីយ៉ាងសំខាន់ណាស់​ដែលរាប់តាំង​ពីការ​កសាងប្រទេសជាតិតាំងពីបាតដៃទទេរហូតឲ្យរីកចម្រើនមកដល់ពេលនេះ។

ស្រដៀងគ្នាខាងលើនេះក្រុមកម្មករកាត់ដេរនៅរោងចក្រសម្លៀកបំពាក់ ជាវៃ ស្ថិតនៅ​តំបន់​ដំបូល​ខៀវ សង្កាត់ចោមចៅ ខណ្ឌពោធិ៍សែនជ័យ បាននិយាយថា ការដឹកនាំសព្វថ្ងៃនេះ ពួក​គាត់​ជឿជាក់​គណបក្សប្រជាជនកម្ពុជាតែមួយគត់ ដោយសារគណបក្សនេះ មិនដែលរើសអើង ឬ​ទុក​កម្មករ​ណាម្នាក់ចោលនោះទេ ពោលគឺ តែងតែគិតគូរពីសុខទុក្ខជានិច្ច តាមរយៈការដាក់​ចេញ​នូវ​គោល​ការណ៍នានា សំដៅរក្សាឲ្យបាននូវសុខដុមរមនាក្នុងទំនាក់ទំនងវិជ្ជាជីវៈ និងការ​ទទួល​បាន​នូវ​សុខ​មាលភាពសង្គម និងអត្ថប្រយោជន៍ផ្សេងៗ។

សូមជម្រាបថា ក្នុងឱកាសប្រារព្ធខួប៧៣ឆ្នាំគណបក្សប្រជាជនកម្ពុជា ប្រជាពលរដ្ឋ កម្មករ​កម្មការិនី មានការជឿជាក់ និងស្រឡាញ់គណបក្សប្រជាជនកម្ពុជា ជឿជាក់លើ​គោល​នយោបាយ​របស់​គណបក្ស​ដែលបានដាក់ចេញហើយតែងតេសម្រេចបានជូនពលរដ្ឋ។ គណបក្សប្រជាជន​កម្ពុជា​តែងតែនៅរួមរស់ជាមួយប្រជាពលរដ្ឋគ្រប់កាលទេសដែលលំបាកៗជានិច្ច។ ជា​ពិសេស​ក្រោម​ការ​ដឹកនាំដោយរាជរដ្ឋាភិបាល អាណត្តិទី៧​នៃ​រដ្ឋសភា​ក៏​កំពុង​ធ្វើ​ឱ្យ​សេដ្ឋកិច្ច​ជាតិ​មាន​ការ​រីក​ចម្រើន​លឿនទៅមុខបន្ថែមទៀត៕ អត្ថបទ ឈិត បូរ៉ាវី