មន្ទីរបញ្ចកោណបានព្រមានអ៊ីស្រាអែលពីការបង្កើតឲ្យមាន «កំហុសឆ្គង» នៅតាមព្រំដែនភាគខាងជើងរបស់ខ្លួនជាមួយប្រទេសលីបង់ ខណៈដែលការប្រយុទ្ធគ្នា រវាងកងកម្លាំងការពារជាតិអ៊ីស្រាអែល (IDF) និងកងជីវពល Hezbollah (ហេសបូឡាហ៍) ដែលមានសម្ព័ន្ធមិត្តជាមួយអ៊ីរ៉ង់ នៅតែបន្តមាន ហើយមេដឹកនាំអ៊ីស្រាអែលបានគំរាមបើកការលុកលុយឆ្លងព្រំដែនពេញទំហឹងតែម្ដង។

ដោយបាននិយាយជាមួយអ្នកសារព័ត៌មាន កាលពីដើមសប្តាហ៍នេះ អ្នកនាំពាក្យមន្ទីរបញ្ចកោណ លោកឧត្តមសេនីយ៍ទោ Pat Ryder បានប្រាប់ថា សហរដ្ឋអាមេរិកជឿជាក់ថា ដំណោះស្រាយការទូត ចំពោះភាពតានតឹងតាមព្រំដែន នៅតែអាចសម្រេចបាន ហើយថា «គ្មាននរណាម្នាក់» នឹងទទួលបានអត្ថប្រយោជន៍ពីសង្គ្រាមថ្មី រវាងអ៊ីស្រាអែល និងលីបង់ ដែលអាចធ្វើឲ្យតំបន់ធ្លាក់ចូលទៅក្នុងជម្លោះនាពេលថ្មីៗនេះនោះទេ។

លោក Ryder បាននិយាយថា៖ «យើងជឿជាក់យ៉ាងមុតមាំថា ដំណោះស្រាយការទូត ចំពោះភាពតានតឹងនៅតាមព្រំដែនអ៊ីស្រាអែល-លីបង់ គឺជាផ្លូវដែលត្រូវជ្រើសរើស។ ហើយការធ្វើបែបនោះ គឺដើម្បីទប់ស្កាត់ការកើនឡើងនូវជម្លោះកាន់តែខ្លាំងឡើងៗ និងជាពិសេសក្នុងស្ថានភាពបែបនេះ ដែលមានហានិភ័យបង្កើតកំហុសឆ្គងដែលគ្មាននរណាម្នាក់ចង់ឃើញនោះឡើយ»។ លោក Ryder បានបន្ថែមថា៖ «គ្មាននរណាម្នាក់ជាអ្នកឈ្នះនោះទេ ប្រសិនបើជម្លោះក្នុងតំបន់កាន់តែរាលដាលខ្លាំងទៅៗ»។

គួរបញ្ជាក់ថា ការប្រយុទ្ធគ្នាឆ្លងព្រំដែន បានកើតមានឡើងសឹងតែមិនដាច់ គិតចាប់តាំងពីមានការវាយប្រហារថ្ងៃទី៧ ខែតុលារបស់ក្រុមហាម៉ាសទៅលើភាគខាងត្បូងអ៊ីស្រាអែល ដោយក្រុមហេសបូឡាហ៍ ជាសមាជិករបស់ក្រុម «អ័ក្សនៃការតស៊ូ» ដឹកនាំដោយអ៊ីរ៉ង់ បើកការវាយប្រហារ ដើម្បីជួយគាំទ្រក្រុមសកម្មប្រយុទ្ធប៉ាឡេស្ទីន និងទាមទារឲ្យអ៊ីស្រាអែលដកចេញទាំងស្រុងពីតំបន់ហ្កាហ្សាស្ទ្រីប។

អ៊ីស្រាអែលបានធ្វើឃាតជាច្រើនដងទៅលើមន្ត្រីជាន់ខ្ពស់របស់ក្រុមហេសបូឡាហ៍ និងក្រុមហាម៉ាស នៅលីបង់ ទាំងនៅតំបន់ភាគខាងត្បូងដែលគ្រប់គ្រងដោយក្រុមនេះ និងនៅក្នុងរដ្ឋធានីបេរូត។ ទន្ទឹមនឹងនោះ បើយោងតាម IDF បានឲ្យដឹងថា អស់រយៈពេលជាច្រើនខែមកនេះ ទាហានអ៊ីស្រាអែលបានហ្វឹកសមសម្រាប់ការលុកលុយដែលអាចកើតមានទៅភាគខាងត្បូងលីបង់ ដោយ «ផែនការប្រតិបត្តិការ» សម្រាប់ការវាយលុកចូលលីបង់ «ត្រូវបានអនុម័ត និងក្លាយជាច្បាប់ជាធរមានរួចហើយ»៕