ភ្នំពេញ ៖ ប្រធានសមាគមពាណិជ្ជករដឹកជញ្ជូន និងខ្សែច្រវ៉ាក់ផ្គត់ផ្គង់នៅកម្ពុជា រំពឹងថា ស្ថានភាពការដឹកជញ្ជូនទំនិញនៅក្នុងឆ្នាំនេះ នឹង មានសកម្មភាពមមាញឹកកាន់តែខ្លាំង ស្របពេលស្ថានភាពសេដ្ឋកិច្ចសកល ក៏ដូចសេដ្ឋកិច្ចកម្ពុជា បានកំពុងងើបឡើងវិញជាបណ្តើរៗ។ 

​លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវ៉ាក់ផ្គត់ផ្គង់នៅកម្ពុជា ថ្លែងលើកឡើងក្នុងកិច្ចសម្ភាសន៍ ជាមួយភ្នាក់ងារអ្នកយកព័ត៌មាន BTV ទាក់ទិននិងសេវាកម្មដឹកជញ្ជូន នេះថា ពាក់ព័ន្ធការដឹកជញ្ជូននេះ គឺបានពឹងផ្អែកទាំងស្រុងដល់ សកម្មភាពសេដ្ឋកិច្ចក្នុងស្រុក ក៏ដូចជាសេដ្ឋកិច្ចសកល ជាក់ស្តែងនៅក្នុងឆ្នាំ ២០២៤ នេះ រាជរដ្ឋាភិបាលរំពឹងថា សេដ្ឋកិច្ចក្នុងស្រុក នឹងឡើងវិញ ស្របពេលសេដ្ឋកិច្ចសកល ជាពិសេសប្រទេសដែលជាដៃគូពាណិជ្ជកម្មរបស់កម្ពុជា មានភាពល្អប្រសើរឡើងវិញផងដែរ។

លោក បន្តថា ស្របពេលសេដ្ឋកិច្ចរើបឡើងវិញនេះ គឺជាការគាំទ្រដល់វិស័យដឹកជញ្ជូន ដោយរំពឹងថា និងមានសកម្មភាព មមាញឹកជាងឆ្នាំមុន ស្របពេលហេដ្ឋារចនាសម្ព័ន្ធក្នុងស្រុក កំពុងជំរុញអភិវឌ្ឍន៍ឥតឈប់ឈរ ជាពិសេសផ្លូវល្បឿនលឿន និងបណ្តា ផ្លូវគាំទ្រដល់ការដឹកជញ្ជូនផ្សេងៗទៀត កំពង់ផែទឹកជ្រៅ ផ្លូវរថភ្លើង និងគម្រោងអភិវឌ្ឍន៍ព្រែកជីកហ្វូណនតេជោជាដើម ដែលសុទ្ធ សឹងជាហេដ្ឋារចនាសម្ព័ន្ធគាំទ្រដល់ការដឹកជញ្ជូន គាំទ្រដល់ការងើបឡើងវិញនៃសកម្មភាពសេដ្ឋកិច្ចក្នុងស្រុក។

សូមបញ្ជាក់ថា នៅក្នុងឆ្នាំ ២០២៤ រាជរដ្ឋាភិបាលរំពឹងថា វិស័យសេវាកម្ម នឹងបន្តនិន្នាការកើនឡើងល្អ ក្នុងអត្រាជិត ៧ ភាគរយ ដោយសារការងើបឡើងវិញនៃសកម្មភាពសេដ្ឋកិច្ចក្នុងស្រុក ជាពិសេសអនុវិស័យសណ្ឋាគារ និងភោជនីយដ្ឋាន អនុវិស័យលក់ដុំ-រាយ និងការដឹកជញ្ជូនជាដើម, ជាក់ស្តែងអនុវិស័យដឹកជញ្ជូន និងគមនាគមន៍ក្នុងឆ្នាំនេះ នឹងបន្តកើនឡើង ដែលគាំទ្រដោយការងើបឡើង វិញនៃសកម្មភាពដឹកជញ្ជូនបម្រើឲ្យវិស័យទេសចរណ៍ និងពាណិជ្ជកម្ម ស្របពេលគមនាគមន៍ក៏នៅបន្តរក្សានិន្នាការល្អប្រសើរ ដោយ ការបន្តកើនឡើងនៃការប្រើប្រាស់អ៊ីនធឺណេត និងឌីជីថលក្នុងអាជីវកម្ម និងជីវភាពប្រចាំថ្ងៃក្នុងគន្លងប្រក្រតីភាពថ្មី៕

អត្ថបទ៖ សុន រ៉ាឌី