ក្រសួងបង្រួបបង្រួមកូរ៉េខាងត្បូង កាលពីថ្ងៃព្រហស្បតិ៍ (ទី២៧ ខែមិថុនា) បាននិយាយថា សក្ខីកម្មពីអ្នករត់ភៀសខ្លួនពីកូរ៉េខាងជើង បានបង្ហាញថា របបលោក គីម ជុងអ៊ុន បានអនុវត្តទោសប្រហារជីវិតជាសាធារណៈលើបុគ្គលដែលត្រូវបានចាប់ខ្លួន ពេលចែកចាយរឿងភាគទូរទស្សន៍ ភាពយន្ត ឬតន្ត្រី K-pop (ខផប់) របស់កូរ៉េខាងត្បូង ក្រោមច្បាប់ឆ្នាំ២០២០។

យោងតាមរបាយការណ៍ពីសិទ្ធិមនុស្សរបស់កូរ៉េខាងជើង ឆ្នាំ២០២៤ ដែលចេញផ្សាយដោយក្រសួង នៅទីក្រុងសេអ៊ូល សក្ខីកម្មបានបង្ហាញថា មាន «ការកើនឡើងនៃការប្រហារជីវិតជាសាធារណៈដោយផ្អែកលើការរំលោភលើច្បាប់ ស្តីពីការបដិសេធមនោគមវិជ្ជា និងវប្បធម៌ប្រតិកិរិយា»។ ច្បាប់នោះហាមឃាត់ការចូលទៅប្រើប្រាស់ កាន់កាប់ ឬចែកចាយព័ត៌មានខាងក្រៅ ពី «ប្រទេសជាសត្រូវ» ក្នុងនោះរួមទាំងពីកូរ៉េខាងត្បូងផងដែរ និងចែងថា ការបំពានអាចនាំឲ្យមានទោសប្រហារជីវិត។

អ្នករត់ភៀសខ្លួនអនាមិកម្នាក់ បានរៀបរាប់ពីការឃើញផ្ទាល់នូវការប្រហារជីវិតជាសាធារណៈលើកម្មករកសិដ្ឋានអាយុ ២២ឆ្នាំ នៅឯអណ្តូងរ៉ែមួយ ក្នុងខេត្ត Hwanghae ខាងត្បូង កាលពីឆ្នាំ២០២២។

គួរបញ្ជាក់ថា របាយការណ៍ដែលបានចេញផ្សាយ នៅថ្ងៃទី២៧ ខែមិថុនា គឺជារបាយការណ៍សាធារណៈទី២ ចាប់តាំងពីឆ្នាំ២០២៣ ដែលរៀបរាប់លម្អិតអំពីការរំលោភសិទ្ធិមនុស្ស និងការរំលោភបំពាននានា នៅកូរ៉េខាងជើង។ ហើយបើយោងតាមក្រសួងបង្រួបបង្រួម បានឲ្យដឹងថា របាយការណ៍នេះ គឺផ្អែកលើសក្ខីកម្មរបស់អ្នករត់ចេញពីកូរ៉េខាងជើងចំនួន ៦៤៩នាក់ ដែលបានភៀសខ្លួនពីស្រុកកំណើតរបស់ពួកគេ នៅឆ្នាំ២០២៣៕