មេដឹកនាំកោះតៃវ៉ាន់ លោក ឡៃ ឈីងតឺ(Lai Ching-te) បាននិយាយនៅថ្ងៃសុក្រ ទី២៨ ខែមិថុនានេះ ថា សន្តិភាពនៅក្នុងច្រកសមុទ្រតៃវ៉ាន់ ផ្តល់ផលប្រយោជន៍ដល់ពិភពលោកទាំងមូល ហើយសហគមន៍អន្តរជាតិ ជឿថាបើគ្មានច្រកសមុទ្រនេះទេ នោះវាគ្មានទាំងវិបុលភាព និងសន្តិសុខ។

ប្រទេសចិន ដែលបានចាត់ទុកកោះតៃវ៉ាន់គ្រប់គ្រងតាមបែបលទ្ធិប្រជាធិបតេយ្យ ថា ជាដែនដីរបស់ខ្លួន បានបង្កើនសម្ពាធទៅលើ លោក Lai ជាអ្នកដែលប្រទេសចិនចាត់ទុកថាជា «អ្នកផ្តាច់ខ្លួន» ហើយបានរៀបចំហ្គេមសង្រ្គាម រយៈពេលពីរថ្ងៃ បន្ទាប់ពីលោក បានចូលកាន់តំណែង កាលពីខែមុន។

យោធារបស់ប្រទេសចិន ក្នុងរយៈពេល៤ឆ្នាំកន្លងទៅនេះ បានបង្កើនសកម្មភាពរបស់ខ្លួនយ៉ាងច្រើននៅក្នុងច្រកសមុទ្រដ៏តូចចង្អៀតនេះ ដែលជាផ្លូវទឹកអន្តរជាតិដ៏សំខាន់សម្រាប់ពាណិជ្ជកម្ម ហើយតែងតែហោះហើរយន្តហោះចម្បាំងនៅទីនោះ និងធ្វើប្រតិបត្តិការនាវាចម្បាំង។

ថ្លែងទៅកាន់ទាហានបណ្តុះបណ្តាល នៅមូលដ្ឋានមួយកន្លែងក្នុងទីក្រុង ថៃឆឹង(Taichung) នៅកោះតៃវ៉ាន់ភាគកណ្តាល លោក Lai បាននិយាយថា រាល់ដំណក់ញើស របស់ទាហានយើង គឺដើម្បីការពារសន្តិសុខកោះតៃវ៉ាន់។

កោះតៃវ៉ាន់ នឹងរៀបចំសមយុទ្ធយោធា មានឈ្មោះថា ហានគ័ង(Han Kuang) ប្រចាំឆ្នាំរបស់ខ្លួននៅខែក្រោយ ដែលនៅឆ្នាំនេះ នឹងមានភាពកាន់តែកៀកតាមដែលអាចធ្វើទៅបាន សម្រាប់ការប្រយុទ្ធជាក់ស្តែង ជាអ្វីដែលក្រុមមន្ត្រីចាត់ទុកថាជា ការគំរាមកំហែងកើនឡើង ពីសំណាក់ប្រទេសចិន។