នៅថ្ងៃសុក្រនេះ ចិនបានជំរុញសហរដ្ឋអាមេរិក ឲ្យបញ្ឈប់ការអត់ឱន និងការគាំទ្រសកម្មភាពបង្ករឿងរបស់ហ្វីលីពីន ក្រោយអនុរដ្ឋមន្រ្តីការបរទេសសហរដ្ឋអាមេរិកលោក Kurt Campbell បង្ហាញក្តីកង្វល់ចំពោះសកម្មភាពអស្ថិរភាពរបស់ទីក្រុងប៉េកាំងនៅក្នុងសមុទ្រចិនខាងត្បូង ។

ក្រសួងការបរទេសសហរដ្ឋអាមេរិក និយាយថា លោក Campbell បានផ្តល់អនុសាសន៍បែបនេះ ប្រាប់ដល់អនុរដ្ឋមន្រ្តីការបរទេសចិនលោក Ma Zhaoxu អំឡុងការជជែកគ្នាតាមទូរស័ព្ទ កាលពីថ្ងៃព្រហស្បតិ៍ ។

អំឡុងសន្និសីទសារព័ត៌មាននៅថ្ងៃសុក្រនេះ អ្នកនាំពាក្យក្រសួងការបរទេសចិនអ្នកស្រី Mao Ning និយាយថា ហ្វីលីពីន ពុំអើពើនឹងការយល់ស្របជាមួយចិន យកតែឈ្នះអធិបតេយ្យភាព និងបូរណភាពទឹកដីរបស់ខ្លួន ហើយនៅតែជំនះបញ្ជូនសម្ភារៈសំណង់ទៅកាន់នាវាចម្បាំងជាប់កឿង នៅតំបន់ថ្មប៉ប្រះទឹក Second Thomas ។

កាលពីពេលថ្មីៗនេះ ចិន និងហ្វីលីពីន បានចោទប្រកាន់គ្នាទៅវិញទៅមក ពាក់ព័ន្ធនឹងសមយុទ្ធដ៏គ្រោះថ្នាក់ និងខុសច្បាប់ ធ្វើឲ្យប៉ះពាល់ដល់នាវារបស់ពួកគេ នៅជុំវិញតំបន់ជម្លោះថ្មប៉ប្រះទឹក Second Thomas ៕