ភ្នំពេញ ៖ នៅថ្ងៃទី២៨ ខែមិថុនា ឆ្នាំ២០២៤ នេះ អ្នកជំនាញចាប៉ីដងវែងកម្ពុជាដ៏ល្បាញល្បីមួយរូប គឺព្រឹទ្ធាចារ្យ គង់ ណៃ បានទទួលមរណភាពហើយ។ លោកព្រឹទ្ធចារ្យបានទទួលមរណភាពក្នុងជន្មាយុ ៨០ ឆ្នាំ។ ដំ ណឹងដ៏អកុសលនេះ បានធ្វើឱ្យសាធារណជនជាច្រើនមានក្ដីរន្ធត់ និងសោកស្ដាយជាខ្លាំង ចំពោះការបាត់បង់នូវមរតកមនុស្សរស់ដែលជាធនធានដ៏កម្ររូបនេះ។ សពរបស់ព្រឹទ្ធាចារ្យកោសល្យវោហារ គង់ ណៃ កំពុងតម្កល់រៀបចំធ្វើបុណ្យតាមទំនៀមប្រពៃណី និងសាសនា នៅភូមិដូង ឃុំស្វាយទង ស្រុកកំព ង់ត្រាច ខេត្តកំពត។

ភ្លាមៗក្រោយមរណភាពរបស់លោកព្រឹទ្ធាចារ្យកោសល្យវោហារ គង់ ណៃ, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានផ្សព្វផ្សាយនៅក្នុងបណ្ដាញសង្គមផ្ទាល់របស់សម្ដេច ដើម្បីចូលរួមរំលែកនូវទុក្ខដ៏ក្រៀមក្រំបំផុតនេះ ចំពោះក្រុមគ្រួសារលោកព្រឹទ្ធាចារ្យ។

សម្ដេចធិបតីនាយករដ្ឋមន្ត្រី បានចាត់ទុកមរណភាពរបស់លោកព្រឹទ្ធាចារ្យ គង់ ណៃ គឺជាការបាត់បង់នូវមរតកមនុស្សរស់នៃសិល្បៈចាប៉ីដងវែង ដែលជាមរតកសិល្បៈដូនតាខ្មែរបានបន្សល់ទុកតាំងពីយូរលង់ណាស់មកហើយ ជាពិសេសក្រោយរបបប្រល័យពូជសាសន៍ ប៉ុល ពត ដ៏ឃោរឃៅលោកព្រឹទ្ធា ចារ្យកោសល្យវោហារបានខិតខំប្រឹងប្រែងអស់កម្លាំងកាយចិត្ត ថែរក្សា ការពារ ផ្ទេរបន្ដនូវចំណេះដឹង និងបន្សល់ទុកនូវសា្នដៃជាច្រើនសម្រាប់អ្នកជំនាន់ក្រោយ។

ក្រៅពីមានក្តីក្តុកក្តួលរំជួលចិត្ត និងសោកស្តាយឥតឧបមា ចំពោះមរណភាពរបស់ព្រឹទ្ធាចារ្យកោសល្យវោហារ គង់ ណៃ, ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈបានចាត់ទុកមរណភាពរបស់ព្រឹទ្ធាចារ្យកោសល្យវោហារ គឺជាការបាត់បង់នូវស្វាមី ឪពុក និងជីតាមួយរូបដែលប្រកបដោយព្រហ្មវិហារធម៌ និងក្តីសណ្តោស ក៏ដូចជាការបាត់បង់នូវធនធានមនុស្សល្អឆ្នើមមួយរូបដែ លពោរពេញដោយឆន្ទៈមនសិការក្នុងការបម្រើបុព្វហេតុ ជាតិ សាសនា ព្រះមហាក្សត្រ គ្រប់កាលៈទេសៈ ព្រមទាំងបានរួមចំណែកយ៉ាងសកម្ម ក្នុងការលើកស្ទួយតម្លៃនៃវប្បធម៌ជាតិខ្មែរ និងខិតខំប្រឹងប្រែងអស់កម្លាំងកាយចិត្តរក្សាការពារ ផ្ទេរបន្ដនូវចំណេះដឹង និងបន្សល់ទុកនូវសា្នដៃគួរឱ្យកោតសរសើរ និងចងចាំសម្រាប់កុលបុត្រកុលធីតាខ្មែរជំនាន់ក្រោយ ប្រកបដោយជំនាញវិជ្ជាជីវៈ និងស្មារតីទទួលខុសត្រូវខ្ពស់ជារៀងរហូតមក។

នៅថ្ងៃនេះដែរ ក្រសួងវប្បធម៌ និងវិចិត្រសិល្បៈបានផ្ញើនូវសារលិខិតជូនចំពោះក្រុមគ្រួសារលោកព្រឹទ្ធា ចារ្យ គង់ ណៃ ដោយបង្ហាញនូវការអាឡោះអាល័យ និងក្តីសង្វេគជាពន្លឹក ចំពោះមរណភាពរបស់លោ កព្រឹទ្ធាចារ្យកោសល្យវោហារ ដែលនេះគឺជាការបាត់បង់ស្វាមី ឪពុក និងជីតា ជាទីគោរពស្រឡាញ់មួ យរូបដែលប្រកបដោយព្រហ្មវិហារធម៌ និងជាការបាត់បង់នូវមរតកមនុស្សរស់ដ៏ឆ្នើមមួយរូប ដែលបានលះបង់ពេលវេលា និងកម្លាំងកាយចិត្តពេញមួយជីវិត ក្នុងការរួមចំណែកលើកស្ទួយវិស័យវប្បធម៌ចាប៉ីដងវែង តាមរយៈការសម្តែង ការបង្ហាត់បង្រៀនដល់កូនចៅ និងអ្នកដែលមានចិត្តចង់ថែរក្សានូវជំនាញដ៏ល្អផូរផង់នេះ។

ព្រឹទ្ធាចារ្យ គង់ ណៃ គឺជាសិល្បករចាប៉ីដងវែងល្បីល្បាញមួយរូបរបស់កម្ពុជា ដែលទទួលបានពានរង្វា 

ន់សិល្បៈវប្បធម៌ Fukuoka Prize របស់ជប៉ុន។ លោកព្រឹទ្ធចារ្យបានទទួលគោរមងារថ្នាក់ជាតិថា ព្រឹទ្ធា ចារ្យកោសល្យវោហារ គង់ ណៃ។ ក្រៅពីមានគោរមងារថ្នាក់ជាតិ ជាមរតកមនុស្សរស់ហើយនោះ, លោកព្រឹទ្ធាចារ្យក៏ធ្លាប់ទទួលបានពានរង្វាន់ទាំងថ្នាក់ជាតិ និងអន្តរជាតិជាច្រើនផងដែរ។ 

ព្រឹទ្ធាចារ្យ គង់ ណៃ កើតនៅថ្ងៃទី១៥ ខែមីនា ឆ្នាំ១៩៤៤ នៅភូមិដូង ឃុំស្វាយទងខាងជើង ស្រុកកំពង់ត្រាច ខេត្តកំពត។ កាលពីអំឡុងវ័យប្រមាណ ៤ ឆ្នាំ កុមារ គង់ ណៃ បានធ្លាក់ខ្លួនពិការដោយសារជំងឺអុតធំ។ ក្រោយមកយុវកុមារ គង់ ណៃ បានចាប់ផ្តើមរៀនចាប៉ីដងវែង នៅអំឡុងអាយុប្រមាណ ១៣ ឆ្នាំ ។ យុវកុមាររូបនេះ បានរៀនចាប៉ីដងវែង ពីឪពុកមារបស់គាត់គឺលោក គង់ ទិត។ ក្រោយចេះចាំស្ទាត់,យុវជន គង់ ណៃ ក្នុងវ័យប្រមាណ ១៥ ឆ្នាំក៏បានចាប់ផ្ដើមបញ្ចេញទេពកោសល្លរបស់ខ្លួនតាមរយៈការ សម្ដែងនៅតាមទីសាធារណៈនានា។ គឺនៅពេលនោះហើយ ដែលកេរ្តិ៍ឈ្មោះរបស់យុវជនរូបនេះ ចាប់ផ្ដើមល្បាញល្បីផងដែរ ដោយសារតែភាពប្រសប់ប៉ិននៅក្នុងការច្រៀង និងដេញដងវែងចាប៉ី៕

​ដោយ៖ គង់ ឌិន