គណបក្សស្តាំជ្រុលនិយម គឺគណបក្សរួបរួមជាតិ (RN) របស់ប្រទេសបារាំង បានបន្តការនាំមុខរបស់ខ្លួននៅក្នុងការស្ទង់មតិ ដែលត្រូវបានចេញផ្សាយនៅថ្ងៃចុងក្រោយនៃយុទ្ធនាការមុនការបោះឆ្នោតសភាជុំទី១ នាថ្ងៃអាទិត្យចុងសប្ដាហ៍នេះ ដោយការស្ទាបស្ទង់មតិមួយផ្សេងទៀតបង្ហាញថា គណបក្សនេះទទួលបានសំឡេងភាគច្រើនស្ដួចស្ដើង។

គណបក្សប្រឆាំងជនអន្តោប្រវេសន៍ និងគ្មានជំនឿលើសហភាពអឺរ៉ុប (EU) របស់លោកស្រី Marine Le Pen បាននាំមុខនៅក្នុងការស្ទង់មតិ ចាប់តាំងពីប្រធានាធិបតី លោក Emmanuel Macron បានប្រកាសការបោះឆ្នោតមុនអាណត្តិដ៏គួរឲ្យភ្ញាក់ផ្អើល ក្នុងខែនេះ ដែលបានធ្វើឲ្យប្រទេសបារាំងធ្លាក់ចូលទៅក្នុងភាពមិនច្បាស់លាស់ និងបង្កជាកង្វល់ដល់ប្រទេសអ្នកជិតខាង និងទីផ្សារហិរញ្ញវត្ថុអឺរ៉ុប។

ការស្ទង់មតិថ្មីរបស់ស្ថាប័ន OpinionWay ដែលត្រូវបានចេញផ្សាយដោយសារព័ត៌មាន Les Echos នៅថ្ងៃសុក្រ (ទី២៨ ខែមិថុនា) នេះ បានបង្ហាញថា គណបក្ស RN អាចទទួលបានសំឡេងគាំទ្ររហូតដល់ ៣៧ភាគរយនៃការបោះឆ្នោតសកល ដោយកើនឡើង ២ភាគរយលើកម្រិតស្ទង់មតិ កាលពីមួយសប្តាហ៍មុន។

ប្លុកនិយមកណ្តាលរបស់លោក Macron គឺគណបក្ស Together (រួមគ្នា) ត្រូវបានមើលឃើញថា ទទួលបានសំឡេងគាំទ្រ ២០ភាគរយ ដោយធ្លាក់ចុះ ២ភាគរយពីការចុះផ្សាយចុងក្រោយ។ ចំណែកសម្ព័ន្ធឆ្វេងនិយម គឹគណបក្ស New Popular Front (រណសិរ្សក្រុមឆ្វេងនិយមថ្មី) មានសំឡេងគាំទ្រមិនផ្លាស់ប្តូរនោះឡើយ គឺ ២៨ភាគរយ៕