ប្រភពសន្តិសុខនិងសុខាភិបាលប៉ាឡេស្ទីន បាននិយាយថា យ៉ាងហោចណាស់ជនជាតិប៉ាឡេស្ទីន ១១នាក់ ត្រូវបានសម្លាប់កាលពីថ្ងៃសុក្រ ដោយការវាយប្រហាររបស់អ៊ីស្រាអែល ទៅលើតង់លំនៅដ្ឋានជនភៀសខ្លួន នៅភាគខាងលិចទីក្រុងរ៉ាហ្វា ដែលជាទីក្រុងភាគខាងត្បូងបំផុតរបស់តំបន់ហ្កាហ្សា។

ប្រភពសន្តិសុខ បានប្រាប់សារព័ត៌មានស៊ីនហួថា កងទ័ពអ៊ីស្រាអែល បានបាញ់កាំភ្លើងធំ និងគ្រាប់កាំភ្លើង ទៅលើតង់ក្នុងតំបន់ Al-Mawasi។ ការបាញ់ផ្លោងនោះ បានចាប់ផ្តើមកាលពីយប់ថ្ងៃព្រហស្បតិ៍ បន្ទាប់ពី   រថក្រោះអ៊ីស្រាអែលជាច្រើន បានរុលចូលនៅជិតតំបន់នោះ។

ប្រតិបត្តិការទម្លាក់គ្រាប់បែកនេះ បាននាំឲ្យមានស្ថានភាពភ័យស្លន់ស្លោ និងការភ័យខ្លាច ក្នុងចំណោមអ្នកផ្លាស់ទីលំនៅ ដែលបានចាកចេញពីតង់របស់ពួកគេ ហើយបានភៀសខ្លួនទៅកាន់តំបន់នានា នៅភាគនិរតីនៃទីក្រុងខាន់យូនីស (Khan Younis)។ នេះបើយោងតាមប្រភពក្នុងស្រុក និងសាក្សីឃើញផ្ទាល់ភ្នែក។

ប្រភពសុខាភិបាល បានប្រាប់សារព័ត៌មានស៊ីនហួថា ជនជាតិប៉ាឡេស្ទីន ១១នាក់ បានស្លាប់ និងជាង ៤០នាក់ផ្សេងទៀត បានរងរបួសខុសៗគ្នា ដោយសារការទម្លាក់គ្រាប់បែក ដែលពួកគេទាំងអស់ ត្រូវបានបញ្ជូនទៅមន្ទីរពេទ្យ។