សមាជិកសភាប្រកាន់ជំហរកណ្ដាលមួយរូប នឹងប្រឈមមុខនឹងសិស្សរបស់មេដឹកនាំកំពូលអ៊ីរ៉ង់ ក្នុងការបោះឆ្នោតប្រធានាធិបតីជុំទីពីរ នៅថ្ងៃទី០៥ ខែកក្កដា បន្ទាប់ពីក្រសួងមហាផ្ទៃរបស់ប្រទេសបាននិយាយកាលពីថ្ងៃសៅរ៍ (២៩ មិថុនា) ថា មិនមានបេក្ខជនណាម្នាក់ទទួលបានសំឡេងគាំទ្រគ្រប់គ្រាន់នៅក្នុងការបោះឆ្នោតជុំទីមួយនោះទេ។

ការបោះឆ្នោតកាលពីថ្ងៃសុក្រ ដើម្បីជំនួសអតីតប្រធានាធិបតីអ៊ីរ៉ង់ លោក អ៊ីប្រាហ៊ីម រ៉េស៊ី (Ebrahim Raisi) ដែលបានស្លាប់នៅក្នុងការធ្លាក់ឧទ្ធម្ភាគចក្រ បានស្ថិតក្នុងដំណាក់កាលប្រកួតប្រជែងដ៏តឹងតែងយ៉ាប្រកៀកប្រកិតរវាងសមាជិកសភាជាន់ទាប លោក ម៉ាសស៊ូដ ផេហ៊្សេសឃាន (Massoud Pezeshkian) ដែលជាអ្នកប្រកាន់ជំហរកណ្ដាលម្នាក់ក្នុងចំណោមបេក្ខជនបួនរូប និងអតីតសមាជិកកងឆ្មាំបដិវត្តន៍ លោក សៃអ៊ីត ចាលីលី (Saeed Jalili)។

ក្រសួងមហាផ្ទៃបាននិយាយថា បេក្ខជនទាំងពីររូនេះមិនបានទទួលសំឡេងគាំទ្រ ៥០ ភាគរយបូកមួយ ក្នុងសន្លឹកឆ្នោតជាង ២៥ លានសន្លឹក ដែលតម្រូវឱ្យឈ្នះដាច់នោះទេ ដោយលោក ផេហ៊្សេសឃាន នាំមុខក្នុងសំឡេងគាំទ្រជាង ១០ លានសន្លឹក ទល់នឹងលោក ចាលីលី ដែលមានជាង ៩,៤ លានសំឡេង។

អំណាចធំបំផុតនៅក្នុងប្រទេសអ៊ីរ៉ង់ គឺស្ថិតនៅក្នុងដៃមេដឹកនាំកំពូល លោក អាយ៉ាតូឡា អាលី ខាមីណេ (Ayatollah Ali Khamenei) ដូច្នេះលទ្ធផលនោះនឹងមិនបង្ហាញពីការផ្លាស់ប្តូរគោលនយោបាយសំខាន់ៗណាមួយលើកម្មវិធីនុយក្លេអ៊ែររបស់អ៊ីរ៉ង់ ឬការគាំទ្ររបស់ខ្លួនសម្រាប់ក្រុមជីវពលនៅទូទាំងមជ្ឈិមបូព៌ាឡើយ។ ប៉ុន្តែប្រធានាធិបតីគ្រប់គ្រងរដ្ឋាភិបាលជាប្រចាំថ្ងៃ ហើយនោះអាចជះឥទ្ធិពលដល់ជំហរគោលនយោបាយរបស់អ៊ីរ៉ង់៕