បាល់ទាត់៖ ​ក្រុមព្រះ​ខ័ន​រាជ​ស្វាយរៀងបានប្រកាស​ចុះ​កុងត្រា​ជាមួយ​ខ្សែបម្រើ Emmanuel Junior Mbarga Mkene ប្អូនប្រុស​បង្កើត​របស់​ខ្សែប្រយុទ្ធ​ឆ្នើម Jean Marie Privat Befolo Mbarga ដើម្បី​ពង្រឹង​ក្រុម​នៅ​ជុំ​ទី​២ នៃ​លី​គ​កំពូល​កម្ពុជាឆ្នាំ​២០២១។​

​វត្តមាន​របស់ Emmanuel Mbarga នឹងត្រូវ​បំពេញ​កូតា​កីឡាករ​បរទេស​ត្រៀម​លី​គ​ជុំ​ទី​២ បន្ទាប់ពី​ក្លិប​ព្រះខ័ន​រាជ​ស្វាយរៀងបានប្រកាស​ចែកផ្លូវ​ជាមួយ​ខ្សែបម្រើ​ប្រេ​ស៊ី​ល Thiago de Jesus កាលពី​ថ្មីៗ​កន្លងទៅ ក្រោយ​រួមចំណែក​ជួយ​ក្រុម​បាន ១០​ប្រកួតក្នុង​ជុំ​ទី​១។​ ​ប្អូនប្រុស​បង្កើត​របស់​ម្ចាស់​ស្បែកជើង​មាស ២​សម័យ​រូបនេះបច្ចុប្បន្ន​មាន​វ័យ ២២​ឆ្នាំដែល​ផ្ទេរ​មកពី​ក្លិប Tours FC នៃ​ក្របខណ្ឌ​លំដាប់​ទី​៥ នៃ​លី​គ​បារាំង National 3 ហើយ Emmanuel Mbarga ក៏​ធ្លាប់​លេ​ឲ្យ​ក្លិប Agueda នៅ​ប្រទេស​ព័រ​ទុយ​ហ្គា​ល់ និង​ធ្លាប់​ជាប់​ជម្រើសជាតិ U23 កា​មេ​រ៉ូ​ន​ទៀត​ផង។​

​ដូច្នេះ Emmanuel នឹងត្រូវ​ពួតដៃ​ជាមួយ​បងប្រុស​កីឡាករ Privat និង​កីឡាករ​បរទេស ៣​រូប​ផ្សេងទៀតរួមមាន​ខ្សែប្រយុទ្ធ​អេ​ស្ប៉ា​ញ Miguel Angel Junco Martinez, ខ្សែប្រយុទ្ធ​សេ​ណេ​ហ្គា​ល់ Robert Lopez Mendy និង​ខ្សែបម្រើ​ជប៉ុន Daisuke Kobayashi ដើម្បី​ប្រយុទ្ធ​នៅ​ជុំ​ទី​២ នៃ​លី​គ​កំពូល​កម្ពុជាឆ្នាំ​២០២១ ខាងមុខ។​ ​សូមបញ្ជាក់ថា បច្ចុប្បន្ន​ព្រះខ័ន​រាជ​ស្វាយរៀងកំពុង​ឈរ​លេខ​រៀង​ទី​៤ បណ្ដោះអាសន្នដោយ​រកបាន ១៩​ពិន្ទុ​ក្នុង​ដៃស្មើ​ក្រុម​ណាហ្គា​វើ​ល​ដ៏ បន្ទាប់ពី​ឆ្លងកាត់ ១០​ប្រកួត​ឈ្នះ ៦ ស្មើ ១ និង​ចាញ់ ៣​ប្រកួត តាម​ពីក្រោយ​ក្រុម​កំពូល​តារាង ៣​ពិន្ទុ​ប៉ុណ្ណោះ៕

​អត្ថបទ៖ លី ឈុន​ឡា