លោក Emmanuel Macron បានប្រឈមនឹងហានិភ័យជាច្រើននៅក្នុងអាជីពនយោបាយដែលត្រូវបានសម្គាល់ដោយវិបត្តិរាប់មិនអស់ ប៉ុន្តែការសម្រេចចិត្តរបស់លោក ក្នុងការប្រកាសពីការបោះឆ្នោតមុនអាណាត្តិ អាចនឹងជារឿងមួយជ្រុលហួសហេតុ ដែលធ្វើឲ្យខូចកេរ្តិ៍ដំណែលរបស់លោក និងឈានទៅដល់សម័យកាលដ៏អាក្រក់មួយ។

ភាពរង្គោះរង្គើពីការរំលាយសភាជាតិរបស់លោក Macron បន្ទាប់ពីគណបក្សនិយមកណ្តាលរបស់លោក បានទទួលរងបរាជ័យក្នុងការបោះឆ្នោតនៅអឺរ៉ុប នៅតែមានភាពខ្លាំងក្លាដដែល ដោយសូម្បីតែឥស្សរជនជិតស្និទ្ធនឹងលោកប្រធានាធិបតី បានទទួលស្គាល់ភាពមិនសុខស្រួល ជុំវិញភាពចលាចលនយោបាយ។

កាលពីថ្ងៃអាទិត្យ (ទី៣០ ខែមិថុនា) គណបក្សស្តាំជ្រុលនិយម គឺគណបក្សរួបរួមជាតិ (RN) បានឈ្នះការបោះឆ្នោតសភាជុំទី១។ លទ្ធផលជុំទី២ នៅសប្តាហ៍ក្រោយ នាថ្ងៃទី៧ ខែកក្កដា អាចផ្តល់ឲ្យគណបក្សគូប្រជែងយូរអង្វែងរបស់លោក Macron គឺគណបក្សរបស់លោកស្រី Marine Le Pen នូវតំណែងនាយករដ្ឋមន្ត្រីជាលើកដំបូង ដែលតម្រូវឲ្យមាន «ការរួមរស់ជាមួយគ្នា»។

ប្រជាប្រិយភាពរបស់ Macron បានធ្លាក់ចុះដល់កម្រិតដែលសម្ព័ន្ធមិត្តបានស្នើឲ្យលោកកុំចេញមុខនៅក្នុងយុទ្ធនាការ ដែលមាននាយករដ្ឋមន្ត្រីលោក Gabriel Attal ដឹកនាំ។ ក្នុងចំណោមបញ្ហាផ្សេងៗទៀត សម្រាប់អ្នកគាំទ្រដ៏ស្មោះត្រង់បំផុតរបស់លោក Macron ការមិនពេញចិត្តរបស់អ្នកខ្លះកើតចេញពីការឡើងកាន់តំណែងជាប្រធានាធិបតីដែលមិននឹកស្មានដល់របស់លោក៕