កងកម្លាំងអ៊ីស្រាអែលកាលពីថ្ងៃអាទិត្យ បានបង្កើនការចល័តចូលទៅក្នុងសង្កាត់ Shejaia នៃតំបន់ហ្កាហ្សាភាគខាងជើង ហើយក៏បានរុលចូលកាន់តែជ្រៅទៅក្នុងភាគខាងលិច និងភាគកណ្តាលទីក្រុងរ៉ាហ្វា នៅភាគខាងត្បូង ដោយបានសម្លាប់ជនជាតិប៉ាឡេស្ទីនយ៉ាងតិច ៦នាក់ និងបំផ្លាញផ្ទះសម្បែងជាច្រើន    ខ្នង។

អ្នកស្រុក បាននិយាយថា រថក្រោះអ៊ីស្រាអែលជាច្រើនគ្រឿ ដែលបានចល័តចូលទៅក្នុងទីក្រុង Shejaia កាលពី ៤ថ្ងៃកន្លងទៅ បានបាញ់ផ្លោងទៅកាន់ផ្ទះមួយចំនួន ដែលធ្វើឲ្យប្រជាជនជាច្រើនគ្រួសារជាប់នៅខាងក្នុង និងមិនអាចចាកចេញបាន។

ថ្លែងនៅក្នុងកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីថ្ងៃអាទិត្យ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានលើកឡើងម្តងទៀតនូវជំហររបស់លោកថា គ្មានអ្វីជំនួសជ័យជម្នះក្នុងសង្គ្រាមប្រឆាំងនឹងក្រុមសកម្មប្រយុទ្ធឥស្លាមហាម៉ាសនោះទេ។

លោកបាននិយាយថា៖«យើងប្តេជ្ញាប្រយុទ្ធរហូតដល់យើងសម្រេចបាននូវគោលបំណងទាំងអស់របស់យើងគឺ កម្ចាត់ក្រុមហាម៉ាស បញ្ជូនចំណាប់ថ្នូររបស់យើងទាំងអស់មកវិញ ធានាថា តំបន់ហ្កាហ្សា នឹងមិនក្លាយជាការគំរាមកំហែងដល់អ៊ីស្រាអែលម្តងទៀតទេ ហើយការបញ្ជូនអ្នកស្រុករបស់យើងត្រឡប់ទៅផ្ទះរបស់ពួកគេវិញ ដោយសុវត្ថិភាព នៅភាគខាងត្បូង និងភាខាងជើង។