រដ្ឋាភិបាលជាតិនិយមរបស់ប្រទេសហុងគ្រី ចាប់ផ្តើមធ្វើជាប្រធានសហភាពអឺរ៉ុប (EU) នៅថ្ងៃចន្ទ (ទី១ ខែកក្កដា) ដោយអំពាវនាវតាមសម្ដីរបស់លោក Donald Trump «ធ្វើឲ្យអឺរ៉ុបអស្ចារ្យជាថ្មីម្តងទៀត» បន្ទាប់ពីសមាជិកសភា EU បានចោទជាសំណួរថា តើប្រទេសនេះគួរត្រូវបានអនុញ្ញាតឲ្យទទួលយកតួនាទីនេះ ឬអត់។

ការព្រួយបារម្ភរបស់អ្នកទាំងនោះ គឺផ្អែកលើការប៉ះទង្គិចជាច្រើនរបស់នាយករដ្ឋមន្ត្រី លោក Viktor Orban ជាមួយទីក្រុងប៊្រុចសែល ជុំវិញស្តង់ដាប្រជាធិបតេយ្យ។

អ្នកការទូតហុងគ្រី ប្រាប់ថា ប្រទេសនេះនឹងក្លាយជាអន្តរការីដ៏ស្មោះត្រង់ ខណៈដែលអ្នកវិភាគនិយាយថា វិធានការលេចធ្លោរបស់ទីក្រុងប៊ុយដាប៉េស ក្នុងការបង្កើតគោលនយោបាយរបស់ EU ទំនងជាត្រូវបានអនុវត្តដោយមានកម្រិត ដោយសារទីក្រុងប៊្រុចសែល ស្ថិតក្នុងដំណាក់កាលអន្តរកាល បន្ទាប់ពីការបោះឆ្នោតក្នុងខែមិថុនា។

គួរបញ្ជាក់ថា តួនាទីរបស់ប្រធាន គឺកំណត់របៀបវារៈ ធ្វើជាប្រធានកិច្ចប្រជុំសមាជិករបស់ EU លើគ្រប់វិស័យ លើកលែងតែបញ្ហាបរទេស ឬតំបន់ចាយប្រាក់អឺរ៉ូ ស្វែងរកការឯកភាពក្នុងចំណោមរដ្ឋសមាជិករបស់ EU និងកិច្ចព្រមព្រៀងអន្តរការី ស្តីពីច្បាប់ជាមួយសភាអឺរ៉ុប។

បណ្ដាអ្នកវិភាគបានលើកឡើងថា វានឹងត្រូវចំណាយពេលច្រើនខែ ដើម្បីឲ្យគណៈកម្មការអឺរ៉ុបថ្មី និងសមាជិកសភាថ្មីដោះស្រាយជាមួយបញ្ហាលំបាកនានា តាមមធ្យោបាយសន្តិភាពរបស់ខ្លួន។ នោះមានន័យថា បើទោះបីជាអ្នកនយោបាយស្ដាំជ្រុលនិយម ពេញចិត្តចំពោះអាទិភាពរបស់ហុងគ្រី ដែលធ្វើឲ្យទទួលបានការគាំទ្រនៅក្នុងការបោះឆ្នោត EU ក៏ដោយ ក៏លទ្ធភាពរបស់ប្រធាន ក្នុងការជំរុញគោលនយោបាយ នៅមានកម្រិតដែរ៕