ពោធិ៍សាត់ ៖ នៅថ្ងៃទី១ ខែកក្កដា ឆ្នាំ២០២៤ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និងជាប្រធានក្រុមការងាររាជរដ្ឋាភិបាលចុះជួយខេត្តពោធិ៍សាត់ បានអញ្ជើញជាអធិបតីភាព ក្នុងពិធីបើកការដ្ឋានសាងសង់ ពហុកីឡដ្ឋាន សម្តេចតេជោ ក្រគរ ពិធីនេះក៏មានការអញ្ជើញចូលរួមពី ឯកឧត្តម ខូយ រីដា អភិបាលខេត្តពោធិ៍សាត់ និង ឯកឧត្តមបណ្ឌិត ប្រាំង ជលសា អគ្គនាយកអគ្គិសនីកម្ពុជា ព្រមទាំងមន្ត្រីរាជការ អាជ្ញាធរភូមិ-ឃុំ កងកម្លាំងប្រដាប់អាវុធទាំង៣ អតីតយុទ្ធជន និងប្រជាពលរដ្ឋសរុបប្រមាណ៧០០នាក់ ។ 

គម្រោងសាងសង់ពហុកីឡដ្ឋាន សម្តេចតេជោ ក្រគរ គឺមានទីតាំងស្ថិតនៅ វាលសម្តេចយស ក្នុងភូមិវាលវង់ ឃុំស្នាអន្សា ស្រុកក្រគរ លើផ្ទៃដីប្រមាណ២៥ហិកតា ដោយក្នុងគម្រោងពហុកីឡដ្ឋាននេះ រួមមានរួម តារាងបាល់ទាត់ខ្នាតធំចំនួន២ តារាងបាល់ទាត់ខ្នាតតូចចំនួន៣ តារាងបាល់ទះចំនួន៦ តារាងបាល់បោះចំនួន៣ តារាងវាយសីចំនួន៤ កន្លែងហាត់ប្រាណ វាលស្មៅ កន្លែងក្មេងលេង កន្លែងអង្គុយលេង ស្រះទឹក និងកន្លែងចតរថយន្តជាដើម ដោយគ្រោងចំណាយថវិកាក្នុងការសាងសង់អស់ប្រមាណជិត៨លានដុល្លារសហរដ្ឋអាមេរិក ។

គម្រោងពហុកីឡដ្ឋាន សម្តេចតេជោ ក្រគរ ដែលបានបើកការដ្ឋានសាងសង់ក្នុងពេលនេះ គឺជាសមិទ្ធផលជាប្រវត្តិសាស្ត្រថ្មីមួយបន្ថែមទៀត សម្រាប់ប្រជាជនក្នុងស្រុកក្រគរ ក៏ដូចជាប្រជាពលរដ្ឋក្នុងខេត្តពោធិ៍សាត់ទាំងមូល ដែលកើតចេញពីការប្រឹងប្រែងរបស់រាជរដ្ឋាភិបាល ហើយកីឡារស់ក្នុងសន្តិភាព បើគ្មានសន្តិភាពយើងក៏អាចនាំគ្នាទៅហាត់កីឡាបានដែរ នេះជាការលើកឡើងរបស់ប្រជាពលរដ្ឋ ។

ឯកឧត្តមរដ្ឋមន្ត្រី កែវ រតនៈ មានប្រសាសន៍លើកឡើងថា ចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត បានសម្រេចបង្កើតឱ្យមានពហុកីឡដ្ឋាន សម្តេចតេជោ ក្រគរ ដែលជាទ្រព្យសម្បត្តិដ៏សម្បើមស្គឹមស្គៃទុកជាមរតកដ៏ថ្លៃថ្លាសម្រាប់ជាតិនិងប្រជាពលរដ្ឋទាំងបច្ចុប្បន្ននេះនិងទៅថ្ងៃអនាគត ហើយពហុកីឡដ្ឋាន បានឆ្លើយតបតាមតម្រូវការរបស់ប្រជាពលរដ្ឋ និងអ្នកធ្វើការជាច្រើនពាន់នាក់ក្នុងតំបន់សេដ្ឋកិច្ចពិសេសស្រុក្រគរ ដែលមានរោងចក្រជាច្រើនកំពុងដំណើរការ និងគ្រោងមានរោងចក្រថ្មីជាបន្តបន្ទាប់ទៀត ។ ហើយការបង្កើតពហុកីឡដ្ឋាន នេះឡើងពិតជាបានផ្តល់លទ្ធភាពក្នុងការចូលរួមអភិវឌ្ឍវិស័យកីឡានៅក្នុងខេត្ត និងក្រៅខេត្តឱ្យកកាន់តែរីកចម្រើនឈានទៅមុខជាលំដាប់បន្ថែមទៀត។ ឯកឧត្តម បានថ្លែងរម្លឹកថា កាលពីថ្ងៃទី២០ខែមិនាឆ្នាំ២០១៩ កន្លងទៅនេះសម្តេចតេជោ នាយករដ្ឋមន្ត្រីបានផ្តល់អញ្ជើញជួបសំណេះសំណាលជាមួយកម្មករ កម្មការនីនិងមន្ត្រីរាជការជាង២ម៉ឺននាក់ ដោយយកទីតាំងអតីវាលយន្តហោះសម្តេចយស ជាកន្លែងប្រារព្ធពិធី នៅពេលនោះសម្តេចតេជោ ក៏បានផ្តួចផ្តើមឱ្យប្រែក្លាយ ទីកន្លែងមួយនេះទៅជាពហុកីឡដ្ឋានដែលអាចធ្វើការប្រកួតកីឡាភូមិភាគខាងលិច ។ ឆ្លងតាមអនុសាសន៍ដ៍ថ្លៃថ្លា របស់សម្តេចតេជោ ហ៊ុន សែន ឯកឧត្តម កែវ រតនៈ បានសហការជាមួយរដ្ឋបាលខេត្ត និងស្ថាប័នពាក់ព័ន្ធក៏បានកំណត់យកទីតាំងនេះនិងធ្វើការដោះស្រាយផលប៉ះពាល់ប្រជាពលរដ្ឋចំនួន៥១គ្រួសា រួចរាល់ជាស្ថាពរនិងឈានទៅបើក ការដ្ឋានសាងសង់នៅពេលនេះ ៕

អត្ថបទ ៖ ភិរុណ ពៅ