លោក Yury Popov អនុប្រធានមជ្ឈមណ្ឌលរុស្ស៊ីសម្រាប់ការផ្សះផ្សានៃភាគីប្រឆាំងនៅក្នុងប្រទេសស៊ីរី បាននិយាយកាលពីថ្ងៃអាទិត្យថា យន្តហោះរបស់កងកម្លាំងចម្រុះដឹកនាំដោយសហរដ្ឋអាមេរិក បានរំលោភលើដែនអាកាសរបស់ប្រទេសស៊ីរី នៅក្នុងតំបន់ al-Tanf ចំនួន ១៥ដង កាលពីថ្ងៃសៅរ៍។

លោកបាននិយាយថា៖«យន្តហោះរបស់ក្រុមចម្រុះប្រឆាំងភេរវកម្មអន្តរជាតិ ដែលដឹកនាំដោយសហរដ្ឋអាមេរិក បន្តបង្កើតស្ថានការណ៍ដ៏គ្រោះថ្នាក់ ដែលអាចបណ្តាលឲ្យមានឧបទ្ទវហេតុលើអាកាស ឬឧបទ្ទវហេតុផ្សេងទៀត និងធ្វើឲ្យស្ថានការណ៍ នៅក្នុងដែនអាកាសរបស់ស៊ីរី កើនឡើងភាពតានតឹង។ «យន្តហោះ F-15 របស់សម្ព័ន្ធចំនួនបីគូ យន្តហោះចម្បាំង Rafale មួយគូ យន្តហោះទម្លាក់គ្រាប់បែកវាយប្រហារ A-10 Thunderbolt បីគូ ក៏ដូចជាយន្តហោះឈ្លបយកការណ៍អេឡិចត្រូនិក MS-12W បានរំលោភលើដែនអាកាសរបស់ប្រទេសស៊ីរី នៅក្នុងតំបន់ al-Tanf ដែលនៅទូទាំងផ្លូវអាកាសរត់អន្តរជាតិ ១៥ដង ក្នុងអំឡុងពេលថ្ងៃនោះ»។

តាមការលើកឡើងរបស់លោក លើសពីនេះទៀតនោះ អង្គភាពតម្រួតយោធារុស្ស៊ី បានធ្វើការល្បាតនៅក្នុងទីក្រុង Aleppo, Raqqa និងតំបន់រដ្ឋបាលក្រុង al-Hasakah។ យោងតាមលោក Popov ការវាយប្រហារដោយគ្រាប់ផ្លោងចំនួនពីរលើទីតាំងរបស់ទាហានរដ្ឋាភិបាលស៊ីរីដោយក្រុមភេរវករ ត្រូវបានគេរាយការណ៍ថា នៅក្នុងតំបន់កាត់បន្ថយភាពតានតឹងនៃខេត្ត Idlib។

លោកក៏បាននិយាយដែរថា ទាហានស៊ីរីពីរនាក់ បានរងរបួស ដោយសារការវាយប្រហារដោយគ្រាប់ផ្លោងលើទីតាំងឈរជើងរបស់ទាហានរដ្ឋាភិបាល ក្នុងខេត្ត Idlib និងទីក្រុង Aleppo។