ភ្នំពេញ ៖ នៅថ្ងៃទី១ ខែកក្កដា ឆ្នាំ២០២៤នេះ មានសប្បុរជនចំនួន២ក្រុម បានបន្តនាំយកថវិកា និងអង្ករ មកប្រគល់ជូនកាកបាទក្រហមកម្ពុជា ក្នុងឱកាសខួប១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ឆ្នាំ២០២៤។ ពិធីនេះបានប្រព្រឹត្ដទៅនៅទីស្នាក់ការកណ្ដាល កាកបាទក្រហមកម្ពុជា ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា។

ក្នុងនោះសប្បុរសជនក្រុមទី១ សាខាកាកបាទក្រហមកម្ពុជា ខេត្តកណ្តាល ឧបត្ថម្ភថវិកាចំនួន ៥០០០ដុល្លារអាម៉េរិក និងអង្ករ១០តោន, ទី២ក្រុមប្រឹក្សាគណៈឱសថការីជាតិ ភូមិភាគរាជធានីខេត្ត និងសមាជិកសមាជិកាគណៈឱសថការីទាំង អស់ឧបត្ថមថវិកាចំនួន ១៥,៥១៦,៥០០រៀល និង១,៦៦១.៥៧ ដុល្លារអាម៉េរិក ក្នុងការចូលចំណែកបន្តសកម្មភាព មនុស្ស ធម៌ ជាមួយ កាកបាទក្រហមកម្ពុជា។ 

ក្នុងឱកាសនោះ លោកជំទាវ ពុំ ចន្ទីនី បានថ្លែងថាក្នុងនាមសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមគោរពថ្លែងអំណរគុណយ៉ាងជ្រាលជ្រៅ ជូនចំពោះសប្បុរសជនទាំងអស់ ដែលសមានទឹកចិត្តប្រកបដោយសប្បុរសធម៌ ចូលរួមចំណែកជាមួយកាកបាទក្រហមកម្ពុជា ហើយសកម្មភាពដ៏ថ្លៃថ្លានេះ គឺជាកម្លាំងចលករមិនអាចខ្វះបាន ក្នុងការជួយទ្រទ្រង់និរន្តរភាព នៃប្រតិបត្តិការមនុស្សធម៌ របស់សមាគមជាតិ កាកបាទក្រហមកម្ពុជា។

លោកជំទាវបានបន្ដថា ការប្រើប្រាស់ថវិកា របស់កាកបាទក្រហមកម្ពុជាក្នុងឆ្នាំ២០២៣កន្លងទៅ គឺក្រៅពីប្រើប្រាស់លើប្រតិបត្តិការ ជួយសង្គ្រោះប្រជាជនរងគ្រោះ និងងាយរងគ្រោះនោះ គឺបានប្រើប្រាស់ទៅលើសកម្មភាពមនុស្សធម៌នានា ដូចជា ការជីកអណ្ដូងទឹកស្អាត ការសាងសង់ផ្ទះ ជូនប្រជាពលរដ្ឋ ដែលងាយរងគ្រោះបំផុត នៅតាមមូលដ្ឋាននានា រួមជាមួយការផ្តល់ប្រាក់កម្ចីគ្មានការប្រាក់ ជូនអ្នកងាយរងគ្រោះ នៅតាមមូលដ្ឋានគោលដៅមួយចំនួន ដើម្បីពួកគាត់យកទៅប្រកបរបរអាជីវកម្មផ្សេងៗ ដើម្បីកែប្រែសេដ្ឋកិច្ចគ្រួសាររបស់ខ្លួន និងការផ្តល់ថវិកាជារៀងរាល់ឆ្នាំ ចំនួន១លានដុល្លារអាមេរិក ជូនមូលនិធិគន្ធបុប្ផាជាដើម។

សូមជម្រាបថាសាខា កាកបាទក្រហមកម្ពុជា ខេត្តកណ្តាល បានផ្តល់អំណោយជូនទីស្នាក់ការកណ្តាល កាកបាទក្រហមកម្ពុជា បានចំនួន៨លើករួចមកហើយ រួមទាំងថ្ងៃទី១ ខែកក្កដា ២០២៤នេះ។ ចំណែក ក្រុមប្រឹក្សាគណៈឱសថការីជាតិ ភូមិភាគរាជ ធានីខេត្ត បានចំនួន២លើក រួមទាំងថ្ងៃទី១ ខែកក្កដា ២០២៤នេះ។

គិតមកត្រឹមថ្ងៃទី១ ខែកក្កដា ឆ្នាំ២០២៤នេះ សប្បុរសជន នៅតែបន្ដចូលរួមបរិច្ចាគជូន កាកបាទក្រហមកម្ពុជា ដើម្បីឱ្យដំណើរការមនុស្សធម៌ ជួយជនងាយរងគ្រោះ និងរងគ្រោះបំផុតនៅកម្ពុជា ក៏ដូចជាបណ្ដាប្រទេសជាមិត្ដនៅលើសកលលោក។ ទន្ទឹមនឹងនោះបើទោះបីជាថ្ងៃទី៨ ខែឧសភា កន្លងផុតទៅក៏ដោយ ក៏កាកបាទក្រហមកម្ពុជា នៅតែបន្ដទទួលស្វាគមន៍ និងរង់ចាំជានិច្ច ចំពោះសប្បុរសជនគ្រប់មជ្ឈដ្ឋាន ដែលមានទឹកចិត្តសប្បុរសធម៌ ចូលរួមជាថវិកា និងសម្ភារៈផ្សេងៗ ជូនកាកបាទក្រហមកម្ពុជា ហើយរាល់វិភាគទានទាំងនោះ គឺបានរួមចំណែកធ្វើឲ្យស្ថាប័នមនុស្សធម៌មួយនេះ មានលទ្ធភាពបំពេញបេសកកម្មជួយសង្គ្រោះជនរងគ្រោះ និងរងគ្រោះ ដែលត្រូវការចាំបាច់ ការជួយសង្គ្រោះពីកាកបាទក្រហមកម្ពុជា៕ ​

អត្ថបទ ៖ សំ ងីម​