ក្រោយក្បួនរថយន្តដឹកទំនិញធុនធំ៧គ្រឿង បានបើកកិច្ចសិក្សា ដឹកជញ្ជូនទំនិញ តាមផ្លូវ​គោគ​សាកល្បង ពីទីក្រុងគួនមិញ ប្រទេសចិនចូលមកដល់រាជធានីភ្នំពេញ ប្រទេស​កម្ពុជា​បាន​ជោគ​ជ័យកា​លពីពេលថ្មីៗនេះ ក្រុមហ៊ុនភស្តុភាកម្មបានបន្តសិក្សាទីផ្សារ និងបែបបទ​ការងារ​មួយ​ចំនួន​ទៀត​ដើម្បី​ជំរុញការដឹកទំនិញតាមផ្លូវគោក ពីក្រុងគួនមិញប្រទេសចិន ឆ្លងកាត់តាម​បណ្តា​ប្រទេស​មហា​អនុតំបន់មេគង្គមករាជធានីភ្នំពេញនានៅថ្ងៃខាងមុខ។

ឧកញ៉ាបណ្ឌិត ស៊ុន ចន្ធី ក្នុងនាម ក្រុមប្រឹក្សាភិបាលសមាគមភស្តុភាកម្មកម្ពុជា ថ្លែងប្រាប់ BTV នៅ​ថ្ងៃ​ទី២ ខែកក្កដានេះថា នៅក្នុងដំណើរការសាកល្បងបើកបររថយន្តដឹកទំនិញធុនធំ ដែល​មាន​ផ្ទុក​ទំនិញ​ដូចជា បន្លែស្រស់ សម្ភារការិយាល័យ គ្រឿងសង្ហារិម និងទំនិញផ្សេងៗទៀតនេះ ពី​ក្រុង​គួន​មិញ មកដល់រាជធានីភ្នំពេញនេះ គឺជាកិច្ចការដ៏ល្អ ដែលក្រុមការភស្តុភាកម្ម អ្នក​ជញ្ជូន​ទំនិញ ជំរុញឲ្យមាន ខណៈទំនិញខ្លះ គឺតម្រូវឲ្យដឹកតែតាមផ្លូវគោក មិនអាចដឹកតាមផ្លូវទឹក និង​ផ្លូវ​អាកាស​បាន ហើយការសាកល្បងដឹកជញ្ជូនទំនិញតាមផ្លូវគោកនេះ គឺក៏ចង់ដឹងថា តើ​ការ​ដឹក​ជញ្ជូន​តាម​ផ្លូវមួយណា មានភាពចំណិញជាង។

ឧកញ៉ា បណ្ឌិត ស៊ិន ចន្ធី ថ្លែងថា ក្រោយការសិក្សាពីក្រុមប្រតិភូភស្តុភាកម្ម និង​ប្រតិបត្តិការ​ដឹក​ជញ្ជូន​នានា​បណ្តាប្រទេសសមាជិកមហាអនុតំបន់មេគង្គ ឯកភាពគ្នាថា រួមគ្នាបន្តការសិក្សាទីផ្សារ ការសិក្សាអំពីតម្លៃដឹកជញ្ជូន ការរៀបចំផ្លូវដឹកជញ្ជូន និងការសិក្សាការធ្វើបែបបទឆ្លងដែនទំនិញ តាម​ច្រកព្រំដែនជាដើម ហើយនៅពេលការងារសិក្សានេះបានជោគជ័យ គឺក្រុម​ការងារ​អ្នក​ដឹក​ជញ្ជូនចិន កម្ពុជា និងបណ្តា​ប្រទេស​សមាជិក​មហា​អនុតំបន់​មេគង្គ​នឹង​បើក​ដំណើរ​ការ​ពង្រីក​ការ​ដឹក​ជញ្ជូនទំនិញតាមផ្លូវគោកពីទីក្រុងគួនមិញ ប្រទេសចិន កាត់ ប្រទេស ឡាវ ថៃ ចូលមករាជ​ធានី​ភ្នំពេញ ប្រទេសកម្ពុជា លើចម្ងាយផ្លូវប្រវែង ២៥០០គ.មនេះ ដែលត្រូវចំណាយពេល៥យប់ ៦​ថ្ងៃនេះ។

ឯកឧត្តម តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន​គណៈកម្មាធិការ​ជាតិ សម្របសម្រួលការដឹកជញ្ជូនឆ្លងកាត់ ថ្លែងជំរុញការគាំទ្រឲ្យ​មាន​ការ​ពង្រីក​ការ​ដឹក​ជញ្ជូនទំនិញតាមផ្លូវគោក ពីប្រទេសចិន កាត់បណ្តាប្រទេស​មហា​អនុតំបន់​មេគង្គ​មក​ដល់​កម្ពុជា​នេះ គឺអាចបង្កើនការប្រកួតប្រជែងមាប្រសិទ្ធភាព និងនាំមកនូវ​ផល​ប្រយោជន៍​សេដ្ឋកិច្ច​ដល់​ម្ចាស់​អាជីវកម្ម និងអ្នកប្រើប្រាស់សេវាដឹកទំនិញ៕ អត្ថបទ ស៊ុម សុខជា