គណៈកម្មាធិការជាតិប្រជាធិបតេយ្យអាចតែងតាំងលោក Joe Biden ជាផ្លូវការជាបេក្ខជនប្រធានាធិបតីរបស់ពួកគេនៅថ្ងៃទី២១ ខែកក្កដានេះ ក្នុងបំណងដើម្បីបញ្ចប់ការរំពឹងទុកនៃការជំនួសដែលអាចធ្វើទៅបានបន្ទាប់ពីលោកធ្វើមិនបានល្អ ទល់នឹងអ្នកកាន់តំណែងមុនរបស់លោកមកពីគណបក្សសាធារណរដ្ឋគឺលោក Donald Trump ។

សារព័ត៌មាន Bloomberg បានរាយការណ៍កាលពីថ្ងៃចន្ទដោយសំអាងប្រភពពីមនុស្សដែលដឹងពីបញ្ហានេះថា គណបក្សប្រជាធិបតេយ្យបានគ្រោងនឹងតែងតាំងលោក Biden នៅមុនសន្និបាតខែសីហារបស់ពួកគេ ប៉ុន្តែពេលវេលាដែលត្រូវបានស្នើឡើងនឹងអនុញ្ញាតឱ្យគណបក្សបញ្ឈប់ការជជែក ក្នុងបក្សនៃការជំនួសរូបលោក និងដើម្បីសម្របសម្រួលបន្ថែមទៀតជុំវិញអ្នកត្រូវតែងតាំងរបស់ ទោះបីជាអ្នកខាងក្នុងបក្សមួយចំនួនអំពាវនាវឱ្យលោកចាកចេញទុកឱកាសឲ្យបេក្ខជនថ្មី បន្ទាប់ពីការធ្វើមិនបានល្អក្នុងការជជែកដេញដោលកាលពីថ្ងៃទី ២៧ ខែមិថុនា។

គណៈកម្មាធិការជាតិប្រជាធិបតេយ្យគ្រោងនឹងរៀបចំកិច្ចប្រជុំគណៈកម្មាធិការជាច្រើននៅចន្លោះថ្ងៃទី ១៦ដល់២១ ខែកក្កដា ដើម្បីបញ្ចប់ច្បាប់ និងនីតិវិធីសម្រាប់ការបោះឆ្នោតតាមOnline។ ថ្លែងទៅកាន់សារព័ត៌មាន Fox News ប្រភពពីគណបក្សប្រជាធិបតេយ្យក៏បានបញ្ជាក់ផងដែរថា នៅថ្ងៃទី២១ខែ កក្កដា គឺជាកាលបរិច្ឆេទដ៏សំខាន់ ដែលនឹងមានរយៈពេលត្រឹមបីថ្ងៃប៉ុណ្ណោះ បន្ទាប់ពី លោក Trump ត្រូវបានគេរំពឹងថានឹងទទួលបានការតែងតាំងពីគណបក្សរបស់លោក។

ការប្រឈមមុខគ្នាលើកដំបូងនៃការបោះឆ្នោតឆ្នាំនេះរវាងលោក Trump និង លោក Biden បានធ្វើឡើងកាលពីថ្ងៃព្រហស្បតិ៍សប្តាហ៍មុននៅទីក្រុង Atlanta រដ្ឋ ចចា (Georgia) ។ ក្រុមអ្នកសង្កេតការណ៍នយោបាយបានយល់ស្របយ៉ាងទូលំទូលាយថា ប្រធានាធិបតីអាមេរិកវ័យ៨១ឆ្នាំ រូបនេះ បានបរាជ័យក្នុងការប្រឆាំងនឹងការយល់ឃើញដែលថាលោកមិនមានថាមពល និងស្មារតី ដើម្បីដឹកនាំប្រទេសរយៈពេល ៤ ឆ្នាំទៀតទេ៕