សាលាដំបូងរាជធានីភ្នំពេញនៅព្រឹកថ្ងៃទី០២ ខែកក្កដា ឆ្នាំ២០២៤ បានប្រកាស​សាលក្រម​ផ្តន្ទា​ទោស​មេក្លោង និងសកម្មជនមាតាធម្មជាតិចំនួន ១០នាក់ ដាក់ពន្ធនាគារពី ៦ឆ្នាំ ទៅ ៨ឆ្នាំ និង​ពិន័យ​ជាប្រាក់ចំនួន ១០លានរៀល ពាក់ព័ន្ធការប្រមាថអង្គព្រះមហាក្សត្រ និងរួមគំនិតក្បត់។ ការ​ប្រកាស​សាលក្រមនេះ បានធ្វើឡើងបន្ទាប់ពីបើកសវនាការចំនួន ៥លើករួចមកហើយ។

នៅថ្ងៃទី២ ខែកក្កដា ឆ្នាំ២០២៤ ដែលជាថ្ងៃប្រកាសសាលក្រមនេះ ក្រុមមាតាធម្មជាតិបាននាំគ្នា ស្លៀក​​​ពាក់ខោអាវពណ៌ស ចង ក្រណាត់សនឹងក្បាល ដើម្បីចាំស្តាប់​ការ​ប្រកាស​សាល​ក្រម​នៅ​ខាង​មុខ​តុលាការជាមួយ​នឹងអ្នកគាំទ្រ​របស់​ខ្លួនមួយចំនួន។ នៅព្រឹកថ្ងៃប្រកាសសាលក្រមនេះដែរ ក្រុម​​មាតាធម្មជាតិ ចំនួន៤នាក់ ត្រូវសមត្ថកិច្ចនាំខ្លួន រួមមានកញ្ញា ភួន កែវរស្មី កញ្ញា ឡុង គន្ធា លោក ថុន រដ្ឋ និងលោក លី ចាន់​ដារ៉ាវុត។

 លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ មិនបាន​បញ្ជាក់​អ្វី​ឡើយ​ចំពោះ​ការ​នាំខ្លួននេះ ដោយលោកបញ្ជាក់ថា កំពុងជាប់រវល់។

សូមជម្រាបថា កាលពីឆ្នាំ២០២១ ក្រុមសកម្មជនមាតាធម្មជាតិ​ បាន​ជាប់​ចោទ​ពី​បទ​ប្រមាថ​ព្រះមហាក្សត្រ និងបទរួមគំនិតក្បត់ ក្រោយពីបែកធ្លាយវីដេអូកិច្ចប្រជុំមួយ ដែលពួកគេ​ជជែក​គ្នា។ ចំណែក លោក អាឡិច​ហ្សង់ដ្រូ ហ្គន់សាឡេស ដេវិតសិន (Alex Gonzalez-Davidson) ដែល​ជា​ស្ថាបនិកនៃ​ចលនា​មាតា​ធម្មជាតិ ត្រូវ​បាន​បណ្តេញ​ចេញ​ពី​ប្រទេសកម្ពុជា និងត្រូវ​បាន​ចោទ​ប្រកាន់​ពី​បទ​ រួម​គំនិត​ក្បត់ និង​ប្រមាថ​ព្រះ​មហាក្សត្រកម្ពុជាផងដែរ៕