មន្ទីរពេទ្យបង្អែករាជធានីភ្នំពេញ ខិតខំយកចិត្តទុកដាក់បំពេញតួនាទីជាបុគ្គលិកល្អ គ្រូពេទ្យល្អ ទទួលខុសត្រូវខ្ពស់ក្នុងការផ្តល់សេវាជូនប្រជាពលរដ្ឋ និងនវានុវត្តន៍។ បើតាមលោកវេជ្ជបណ្ឌិត នេត សុវីរៈ នាយកមនី្ទរពេទ្យបង្អែករាជធានីភ្នំពេញ បានថ្លែងប្រាប់BTV ព័ត៌មាន នាព្រឹកថ្ងៃទី២ ខែកក្កដា ឆ្នាំ២០២៤នេះថា បច្ចុប្បន្នមនី្ទរពេទ្យមានផ្តល់សេវាគ្រប់ផ្នែក ដូចជា៖ ពិគ្រោះជំងឺក្រៅ ផ្នែកសង្រ្គោះបន្ទាន់ ផ្នែកសម្ភព ផ្នែកវះកាត់ ធំ ផ្នែកវះកាត់ជំងឺកុមារ ផ្នែក​ភ្នែក ត្រចៀក ច្រមុះ បំពង់ក និងជំនាញផ្សេងៗជាច្រើនទៀត។ ជាពិសេស​ក្រុម​ការងារ​គ្រូ​ពេទ្យ​របស់​យើង បានខិតខំផ្តល់សេវាសុខាភិបាល ជូនប្រជាពលរដ្ឋយ៉ាងយកចិត្តទុកដាក់ជាទីបំផុត។

ទន្ទឹម​នឹងនោះកាលពីថ្ងៃទី២៤ ខែមិថុនា ឆ្នាំ២០២៤កន្លងទៅឯកឧត្តមសាស្រ្តាចារ្យ ឈាង រ៉ា រដ្ឋមន្រ្តី​ក្រសួងសុខាភិបាល បានអញ្ជើញចុះសំណេះសំណាល សួរសុខទុក្ខថ្នាក់ដឹកនាំ មន្រ្តីរាជ​ការ និងពិនិត្យការបម្រើសេវាសុខាភិបាលនៅមន្ទីរពេទ្យបង្អែករាជធានីភ្នំពេញ មណ្ឌល​សុខភាព​ទឹក​ថ្លា និងមន្ទីរសុខាភិបាលនៃរដ្ឋបាលរាជធានីភ្នំពេញ និងបានថ្លែងអំណរគុណ ជូន​ចំពោះ​ថ្នាក់​ដឹកនាំ មន្រ្តីរាជការ និងបុគ្គលិក នៃមន្ទីរសុខាភិបាល នៃរដ្ឋបាលរាជធានីភ្នំពេញទាំងអស់ ដែល​ខិតខំ​បំពេញ​ការងារយកអស់កម្លាំងកាយចិត្ត ក្នុងការខិតខំបម្រើសេវាថែទាំសុខភាព ជូនប្រជា​ពលរដ្ឋ​ប្រកប​ដោយស្មារតីទទួលខុសត្រូវ និងក្រមសីលធម៌វិជ្ជាជីវៈខ្ពស់ ជាពិសេស​ក្នុង​អំឡុង​ពេល​នៃ​ការ​រាត​ត្បាត​នៃជំងឺកូវីដ-១៩។

លោកវេជ្ជបណ្ឌិត នេត សុវីរៈ រួមនឹងថ្នាក់ដឹកនាំ បុគ្គលិក លោកគ្រូពេទ្យ អ្នកគ្រូពេទ្យ ពិតជា​មាន​កី្ត​សប្បាយ​រីករាយដែរបានទទួលស្វាគមន៍វត្តមានដ៏ខ្ពង់ខ្ពស់របស់ឯកឧត្តមសាស្រ្តាចារ្យរដ្ឋមន្រ្តី បាន​ចុះ​ពិ​និត្យការបម្រើសេវាសុខាភិបាល ជូនប្រជាពលរដ្ឋនិងកត់សម្គាល់ឃើញនូវចំនុចមួយ ក្នុងការ​កែ​លម្អ​ដើម្បីបង្កើនប្រសិទ្ធភាពបន្ថែមទៀត និងសូមគោរពជូនពរឯកឧត្តមសាស្រ្តាចារ្យ ឈាង រ៉ា រដ្ឋមន្ត្រី​ក្រសួងសុខាភិបាល ថ្នាក់ដឹកនាំ មន្ត្រីរាជការ និងបុគ្គលិកសុខាភិបាលគ្រប់លំដាប់ថ្នាក់ នៃ​ក្រសួង​សុខាភិបាល សូមសមប្រកបដោយពុទ្ធពរទាំង៤ ប្រការ គឺអាយុ វណ្ណៈ សុខៈ និងពលៈ កុំបី​ឃ្លៀងឃ្លាតឡើយ៕ អត្ថបទ រដ្ឋា