ក្រសួងសេដ្ឋកិច្ច និងឧស្សាហកម្ម បានប្រកាសថា កំណែទម្រង់ការនាំចូលរបស់អ៊ីស្រាអែល បានចូលជាធរមាន កាលពីថ្ងៃចន្ទ ក្នុងគោលបំណងសម្រួលនីតិវិធី និងជំរុញការប្រកួតប្រជែង។

ដោយត្រូវបានដាក់ឈ្មោះថា «No Stopping at Port» កំណែទម្រង់នេះ លុបបំបាត់ឧបសគ្គមុនការនាំចូលសម្រាប់ទំនិញប្រើប្រាស់រាប់ពាន់មុខ ដែលនាំឲ្យមានតម្លៃទាប និងជម្រើសកាន់តែទូលំទូលាយសម្រាប់អ្នកទិញទំនិញ។

កំណែទម្រង់នេះ ជួយសម្រួលដំណើរការនាំចូលសម្រាប់ផលិតផលជាច្រើន ដែលស្ថិតនៅក្រោមស្តង់ដាផ្លូវការ រួមទាំងឧបករណ៍ប្រើប្រាស់ក្នុងផ្ទះទូទៅដូចជា ទូទឹកកក ម៉ាស៊ីនត្រជាក់ និងឧបករណ៍អគ្គិសនីសម្រាប់អាំងនំបុ័ង រួមជាមួយនឹងគ្រឿងអេឡិចត្រូនិច ដូចជាកុំព្យូទ័រ និងទូរទស្សន៍ ក៏ដូចជាប្រដាប់ក្មេងលេង ផលិតផលសម្រាប់ទារក និងកង់។

កំណែទម្រង់នេះ មិនរាប់បញ្ចូលផលិតផលដែលចាត់ទុកថា មានហានិភ័យខ្ពស់ចំពោះសុវត្ថិភាពសាធារណៈ ឬបរិស្ថាន ដូចជាឧបករណ៍វេជ្ជសាស្ត្រ និងសម្ភារសំណង់ជាដើម។

កាលពីមុន ការនាំចូលទំនិញទាំងនេះ តម្រូវឲ្យធ្វើតេស្តនៅមន្ទីរពិសោធន៍ មានវិញ្ញាបនបត្រ និងសេចក្តីប្រកាស ដែលបណ្តាឲ្យមានការចំណាយ ដែលអាចឈានដល់ ៩ភាគរយនៃតម្លៃនាំចូលឯណោះ។

នៅក្រោមប្រព័ន្ធថ្មីនេះ អ្នកនាំចូលគ្រាន់តែត្រូវប្រកាសនៅគយថា ផលិតផលរបស់ពួកគេ បំពេញតាមស្តង់ដាអ៊ីស្រាអែលដែលពាក់ព័ន្ធ និងស្របតាមស្តង់ដាអឺរ៉ុប។