អធិការបតីអាល្លឺម៉ង់លោក Olaf Scholz និងនាយករដ្ឋមន្រ្តីប៉ូឡូញលោក Donald Tusk នឹងជួបគ្នានៅទីក្រុងវ៉ាសូវីនាថ្ងៃអង្គារនេះ ស្របពេលប្រទេសទាំង ២ ដែលមានប្រវត្តិល្អក់កករនឹងគ្នានោះ ព្យាយាមពង្រឹងកិច្ចសហប្រតិបត្តិការ ជាការប្រឈមនឹងការលំបាកផ្នែកសន្តិសុខ និងភាពចលាចរលផ្នែកនយោបាយនៅអឺរ៉ុប ។

មេដឹកនាំទាំង ២ នឹងចូលរួមការពិគ្រោះយោបល់អន្តររដ្ឋាភិបាល ដោយមានការចូលរួមពីក្រុមគណៈរដ្ឋមន្រ្តីមកពីប្រទេសទាំង ២ផងដែរ ដែលជាជំនួបបែបនេះលើកដំបូង ចាប់តាំងពីឆ្នាំ ២០១៨ ។

គួរឲ្យដឹងថា ទំនាក់ទំនងរវាងប្រទេសទាំង ២ បានកក់ក្តៅវិញ ចាប់តាំងពីរដ្ឋាភិបាលចម្រុះគាំទ្រអឺរ៉ុបរបស់លោក Tusk ឡើងកាន់អំណាចកាលពីខែធ្នូ ឆ្នាំ ២០២៣ ដោយបញ្ចប់ការគ្រប់គ្រងរយៈពេល ៨ឆ្នាំរបស់ក្រុមជាតិនិយមនៅប៉ូឡូញ ជាពេលដែលរដ្ឋាភិបាលប្រកាន់ច្បាប់ និងយុត្តិធម៌ តែងតែលាបពណ៌អាល្លឺម៉ង់ថាជាកម្លាំងអរិភាព ។

ជំនួបនេះដែរ បានកើតមានឡើង ស្របពេលដែលប្រទេសទាំង ២ ប្រឈមការងារលំបាកផ្នែកសន្តិសុខ ពាក់ព័ន្ធនឹងសង្រ្គាមនៅអ៊ុយក្រែន និងបរិយាកាសភូមិសាស្ត្រនយោបាយដ៏ច្របូកច្របល់ ពេលដែលក្រុមនិយមស្តាំជ្រុលឈ្នះជុំដំបូងនៃការបោះឆ្នោតសភាបារាំង ហើយក្រុមមេដឹកនាំអឺរ៉ុប ប្រឈមនឹងលទ្ធភាពដែលលោក Donald Trump នឹងវិលត្រឡប់មកកាន់អំណាចវិញជាប្រធានាធិបតីសហរដ្ឋអាមេរិក៕