រដ្ឋមន្ត្រីក្រសួងមហាផ្ទៃទួរគី លោក Ali Yerlikaya បាននិយាយកាលពីថ្ងៃចន្ទថា ជនសង្ស័យសរុបចំនួន ៦៧នាក់ ត្រូវបានឃាត់ខ្លួន បន្ទាប់ពីក្រុមកុបករ បានដុតបំផ្លាញផ្ទះ និងអាជីវកម្មនានាដែលជាកម្មសិទ្ធិរបស់ជនជាតិស៊ីរី កាលពីថ្ងៃអាទិត្យ ហើយបានបំផ្លិចបំផ្លាញរថយន្តរបស់ពួកគេ នៅកណ្តាលទីក្រុង Kayseri។

លោកបាននិយាយនៅលើវេទិកាប្រព័ន្ធផ្សព្វផ្សាយសង្គម X បន្ទាប់ពីមានការចោទប្រកាន់កាលពីថ្ងៃអាទិត្យថា ជនជាតិស៊ីរីម្នាក់ បានធ្វើបាបកុមារ ក្រុមមួយ «ដែលបានប្រមូលផ្តុំគ្នា នៅក្នុងតំបន់នោះ បានប្រព្រឹត្តខុសច្បាប់ជាមួយនឹងអាកប្បកិរិយាមិនស័ក្តិសមនឹងតម្លៃមនុស្សរបស់យើង និងបានធ្វើឲ្យខូចខាតផ្ទះសម្បែង កន្លែងធ្វើការ និងយានយន្តដែលជាកម្មសិទ្ធិរបស់ជនជាតិស៊ីរី»។

លោករដ្ឋមន្ត្រី បាននិយាយថា បុរសជនជាតិស៊ីរី ដែលត្រូវបានកំណត់អត្តសញ្ញាណដោយឈ្មោះដំបូងរបស់ខ្លួនថា I.A. ត្រូវបានគេសង្ស័យថា បានបៀតបៀនក្មេងស្រីជនជាតិស៊ីរី ដែលជាសាច់ញាតិរបស់ខ្លួន ដោយបន្ថែមថា I.A. ត្រូវបានពលរដ្ឋទួរគីចាប់បាន ហើយបញ្ជូនទៅឲ្យនគរបាល។

ក្រសួងសេវាកម្មគ្រួសារ និងសង្គម បាននិយាយថា កុមារស៊ីរីដែលត្រូវបានចោទប្រកាន់ថា បានធ្វើបាបក្មេងស្រីស៊ីរីនោះ កំពុងស្ថិតនៅក្រោមការការពាររបស់រដ្ឋ។

នគរបាល បានប្រើប្រាស់ឧស្ម័នបង្ហូរទឹកភ្នែក និងកាណុងបាញ់ទឹក ដើម្បីបំបែកក្រុមបុរស ដែលបាន     ផ្តោតទៅលើអាជីវកម្ម និងទ្រព្យសម្បត្តិរបស់ស៊ីរី។