ក្រុមនគរបាលបង្រ្កាបកុបកម្មកេនយ៉ា បានបាញ់ឧស្ម័នបង្ហូរទឹកភ្នែកនៅលើហ្វូងបាតុករនៅទីក្រុងណៃរ៉ូប៊ី នាថ្ងៃអង្គារនេះ ក្នុងនោះក្រុមសកម្មជនមួយចំនួន ត្រូវបានចាប់ខ្លួន ហើយបាតុករយ៉ាងហោច ២នាក់ បានរងរបួស ។

ស្រ្តីម្នាក់ ត្រូវបានគេផ្តល់ទឹក ពេលដែលនាងអង្គុយលើចិញ្ចើមផ្លូវ ហូរឈាមពីក្បាល ខណៈដែលអ្នកនៅជុំវិញព្យាយាមជូតឈាមឲ្យនាង ។ ចំណែកបុរសម្នាក់ ត្រូវបានគេសែងដោយក្រុមបាតុករទៅកាន់រថយន្តគិលានសង្រ្គោះ ។

បាតុកម្ម បានផ្ទុះឡើងនៅតាមទីក្រុងជាច្រើនទូទាំងប្រទេស ខណៈដែលក្រុមសកម្មជន ទាមទារឲ្យមានការលាលែងពីតំណែងរបស់លោកប្រធានាធិបតី William Ruto បន្ទាប់ពីការប៉ះទង្គិចស្លាប់មនុស្សរយៈពេល ១សប្តាហ៍ នៅក្នុងបាតុកម្មប្រឆាំងការដំឡើងពន្ធ ។

លោក Ruto ដែលកំពុងប្រឈមវិបត្តិធ្ងន់ធ្ងរបំផុតនៃតំណែងប្រធានាធិបតីរយៈពេលជិត ២ឆ្នាំរបស់លោក បានស្ថិតនៅក្នុងចន្លោះរវាងម្ចាស់កម្ចី គឺមូលនិធិរូបិយប័ណ្ណអន្តរជាតិ(IMF)ដែលទាមទារឲ្យកាត់បន្ថយឱនភាព និងប្រជាពលរដ្ឋដែលទាមទារឲ្យកាត់បន្ថយតម្លៃពន្ធ ។

យោងតាមការអះអាងរបស់គណៈកម្មការជាតិស្តីពីសិទ្ធិមនុស្សកេនយ៉ា បាននិយាយថា មនុស្សយ៉ាងហោច ៣៩នាក់ ត្រូវបានសម្លាប់នៅក្នុងបាតុកម្ម និងការប៉ះទង្គិចគ្នា ចាប់តាំងពីថ្ងៃទី ១៨ ខែមិថុនារហូតមក ៕