ទីភ្នាក់ងារជំនួយអង្គការសហប្រជាជាតិ(UNHCR) និយាយនៅថ្ងៃអង្គារនេះថា ពួកគេនឹងពង្រីកផែនការជំនួយស៊ូដង់ដល់ប្រទេសថ្មីចំនួន ២ គឺប្រទេសលីប៊ី និងប្រទេសអ៊ុយហ្គង់ដា ស្របពេលការមកដល់របស់ជនភៀសខ្លួន បានកើនឡើង ។

ស៊ូដង់ ស្ថិតនៅក្នុងវិបត្តិជនភៀសខ្លួនដ៏អាក្រក់បំផុតរបស់ពិភពលោករួចទៅហើយ ក្នុងនោះ មនុស្សប្រហែល ១២លាននាក់ ត្រូវបានបង្ខំរត់ភៀសខ្លួនដោយសារសង្រ្គាមស៊ីវិល ហើយជាង ២លាននាក់ផ្សេងទៀត បានរត់ភៀសខ្លួនឆ្លងកាត់ព្រំដែន ។ 

ការពង្រីកចុងក្រោយនៃផែនការឆ្លើយតបរបស់ UN នឹងនាំឲ្យចំនួនប្រទេសនៅអាហ្វ្រិកទទួលយកជនភៀសខ្លួនស៊ូដង់ កើនឡើងសរុបដល់ ៧ប្រទេស ។

ការធ្វើដំណើរទៅដល់ប្រទេសលីប៊ី ជាសញ្ញាមួយបញ្ជាក់ថា ជនភៀសខ្លួនអាចនឹងបន្តដំណើររបស់ពួកគេទៅកាន់អឺរ៉ុប គឺជាសេណារីយ៉ូមួយដែលប្រធាន UNHCR បានព្រមានរួចទៅហើយ ក្នុងករណីដែលជំនួយពុំត្រូវបានផ្តល់ជូន ។

ឯកសារផែនការរបស់ UNHCR ដែលបានចុះផ្សាយនៅថ្ងៃអង្គារនេះ បង្ហាញថា ទីភ្នាក់ងារមួយនេះ រំពឹងថា ជនភៀសខ្លួន ១៤៩.០០០នាក់ នឹងធ្វើដំណើរទៅដល់ប្រទេសលីប៊ី មុនដំណាច់ឆ្នាំនេះ ហើយពួកគេព្យាករណ៍ផងដែរថា ជនភៀសខ្លួន ៥៥.០០០នាក់ នឹងធ្វើដំណើរទៅដល់ប្រទេសអ៊ុយហ្គង់ដា បើទោះបីជាប្រទេសមួយនេះ គ្មានព្រំដែនផ្ទាល់ជាមួយស៊ូដង់ក៏ដោយ ៕