ប្រព័ន្ធផ្សព្វផ្សាយ ARY News បានរាយការណ៍ថា តុលាការពិសេស នៅទីក្រុង Rawalpindi របស់ប្រទេសប៉ាគីស្ថាន នៅថ្ងៃអង្គារ (ទី២ ខែកក្កដា) នេះ បានផ្តល់ការធានាឲ្យនៅក្រៅឃុំជាបណ្តោះអាសន្នដល់ភរិយារបស់អតីតនាយករដ្ឋមន្ត្រី លោក Imran Khan ក្នុងសំណុំរឿងពុករលួយ។

លោក Khan ដែលជាប់ពន្ធនាគារតាំងពីខែសីហាឆ្នាំមុន ត្រូវបានកាត់ទោសនៅក្នុងករណីមួយចំនួន មុនការបោះឆ្នោតសកល កាលពីខែកុម្ភៈ ប៉ុន្តែក្រុមការងារសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃចន្ទ (ទី១ ខែកក្កដា) ថា ការដាក់ពន្ធនាគារតាមទំនើងចិត្ត ចំពោះរូបលោក បានបំពានច្បាប់អន្តរជាតិ។

ដោយសំដៅទៅលើការអនុញ្ញាតឲ្យនៅក្រៅឃុំបណ្ដោះអាសន្ននោះ ប្រព័ន្ធផ្សព្វផ្សាយ ARY News បានឲ្យដឹងក្នុងសារមួយនៅលើបណ្ដាញសង្គម X ថា៖ «តុលាការទទួលខុសត្រូវពិសេស បានអនុញ្ញាតដល់ការធានាឲ្យនៅក្រៅឃុំ»។

គួរបញ្ជាក់ថា ទាំងលោក Khan និងភរិយារបស់លោក គឺលោកស្រី Bushra Bibi បដិសេធការប្រព្រឹត្តខុសណាមួយ ក្នុងសំណុំរឿងប្រឆាំងនឹងពួកគេ ទាក់ទងនឹងការចោទប្រកាន់ ដែលថា អ្នកទាំង២ ទទួលជំនួយហិរញ្ញវត្ថុពីអ្នកអភិវឌ្ឍន៍អចលនទ្រព្យ ដើម្បីបង្កើតស្ថាប័នអប់រំមួយ គឺសាកលវិទ្យាល័យ Al Qadir។

តែទោះជាយ៉ាងណាក៏ដោយ ក៏ស្វាមីភរិយាគូនេះ នឹងស្ថិតនៅក្នុងពន្ធនាគារដដែល ខណៈដែលលោកស្រីក៏កំពុងអនុវត្តការជាប់ទោសផងដែរ បន្ទាប់ពីអាពាហ៍ពិពាហ៍របស់លោកស្រីជាមួយលោក Khan ត្រូវបានកាត់ទោសថា មិនស្របច្បាប់។ លោក Khan និងគណបក្សរបស់លោក លើកឡើងថា ការចោទប្រកាន់នេះគឺមានហេតុផលនយោបាយ ដើម្បីរារាំងរូបលោកកុំឲ្យវិលត្រឡប់ទៅកាន់អំណាចវិញ៕