ប្រទេសចិនបានអំពាវនាវឲ្យប្រទេសហ្វីលីពីនចាប់ខ្លួន និងដាក់ទណ្ឌកម្មយ៉ាងធ្ងន់ធ្ងរ លើឃាតកសម្លាប់ពលរដ្ឋចិន នៅក្នុងករណីចាប់ជំរិត ដែលបានជំរុញឲ្យមានអន្តរាគមន៍ការទូតពីទីក្រុងប៉េកាំង ហើយស្ថានទូតចិនប្រចាំនៅប្រទេសអាស៊ីអាគ្នេយ៍មួយនេះ នាថ្ងៃអង្គារ (ទី២ ខែកក្កដា) បានឲ្យដឹងនៅក្នុងសេចក្តីថ្លែងការណ៍មួយថា ពលរដ្ឋចិនត្រូវបានសម្លាប់បន្ទាប់ពីត្រូវបានឃុំខ្លួន កាលពីពេលថ្មីៗនេះ នៅក្នុងប្រទេសហ្វីលីពីន។

បេសកកម្មរបស់ចិនបានជំរុញឲ្យអាជ្ញាធរហ្វីលីពីនជួយសង្គ្រោះចំណាប់ខ្មាំង ដោយនិយាយថា ជនជាតិអាមេរិកជនជាតិចិនម្នាក់ ក៏ត្រូវបានសម្លាប់ផងដែរ។

នៅក្នុងសេចក្តីថ្លែងការណ៍ ដែលត្រូវបានបង្ហោះនៅលើបណ្ដាញសង្គម WeChat របស់ប្រទេសចិន ស្ថានទូតបានលើកឡើងថា៖ «យើងជំរុញឲ្យប្រទេសហ្វីលីពីនពង្រឹងកិច្ចខិតខំប្រឹងប្រែង ក្នុងការស៊ើបអង្កេតករណីនេះ ចាប់ឃាតកឲ្យបានឆាប់តាមដែលអាចធ្វើទៅបាន និងដាក់ទណ្ឌកម្មយ៉ាងធ្ងន់ធ្ងរ»។ ហើយជាមួយគ្នានេះ ស្ថានទូតបានបន្ថែមថា ពលរដ្ឋចិនគួរតែ «បង្កើនការយល់ដឹងអំពីសន្តិសុខ» នៅពេលធ្វើដំណើរទៅកាន់ប្រទេសនេះ។

នាយកដ្ឋានកិច្ចការបរទេសរបស់ទីក្រុងម៉ានីល និងនគរបាលជាតិ មិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មាន Bloomberg News ដើម្បីសុំការអត្ថាធិប្បាយលើករណីនេះ នាថ្ងៃទី២ ខែកក្កដានេះ។

ដោយដកស្រង់ប្រភពមួយ Yicai Global ដែលជាសារព័ត៌មានហិរញ្ញវត្ថុថ្មី ស្ថិតក្រោមការគ្រប់គ្រងរបស់ក្រុមហ៊ុន Shanghai Media Group បានរាយការណ៍ថា ជនរងគ្រោះក្នុងករណីចាប់ជំរិតនេះ ម្នាក់ គឺជានាយកទីផ្សារអន្តរជាតិនៃក្រុមហ៊ុន Raimed Medical Limited ដែលបានចុះបញ្ជីនៅទីក្រុងហុងកុង ហើយម្នាក់ទៀតធ្វើការជាអ្នកចែកចាយឲ្យក្រុមហ៊ុនឧបករណ៍វេជ្ជសាស្ត្រសរសៃឈាមបេះដូង។

អ្នកទាំង ២នាក់បានធ្វើដំណើរជាមួយគ្នាទៅកាន់ប្រទេសហ្វីលីពីន ក្នុងដំណើរអាជីវកម្ម ប្រហែលជានៅថ្ងៃទី២០ ខែមិថុនា ហើយត្រូវបានសម្លាប់នៅថ្ងៃទី២៤ ខែមិថុនា បន្ទាប់ពីគ្រួសារនៃជនរងគ្រោះម្នាក់ បានបង់ប្រាក់លោះចំនួន ៣លានយ័ន (៤១២.៦០០ដុល្លារអាមេរិក)។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយចិន៕