ប្រធានាធិបតីលោក Ranil Wickremesinghe នៅថ្ងៃអង្គារ (ទី២ ខែកក្កដា) នេះ បាននិយាយថា ប្រទេសស្រីលង្កានឹងសន្សំបានការប្រាក់ចំនួន ៥ពាន់លានដុល្លារដែលជំពាក់ម្ចាស់បំណុលទ្វេភាគី ដោយនេះគឺជាផ្នែកមួយនៃដំណើរការរៀបចំរចនាសម្ព័ន្ធបំណុលរបស់ខ្លួន ហើយលោកបានបន្ថែមថា មូលនិធិនេះនឹងត្រូវបានប្រើ ដើម្បីជាជួយជំរុញទុនបំរុងប្រាក់ដុល្លារ និងស្ដារកំណើនសេដ្ឋកិច្ចឡើងវិញ។

លោក Wickremesinghe បានប្រាប់សភាថា ប្រទេសអាស៊ីខាងត្បូងមួយនេះ ដែលមានបញ្ហាថវិកា បានចុះហត្ថលេខាលើកិច្ចព្រមព្រៀងជាមួយប្រទេសចិន និងប្រទេសម្ចាស់បំណុលផ្សេងទៀត ដើម្បីរៀបចំរចនាសម្ព័ន្ធឡើងវិញនូវបំណុលទ្វេភាគីប្រហែល ១០ពាន់លានដុល្លារ កាលពីសប្តាហ៍មុន បន្ទាប់ពីមានការចរចារយៈពេល ១៥ខែ។

កិច្ចព្រមព្រៀងទាំងនោះ បាននាំប្រទេសស្រីលង្កាកាន់តែខិតជិតដល់ការបញ្ចប់នៃដំណើរការរៀបចំរចនាសម្ព័ន្ធបំណុល ដែលបានចាប់ផ្តើមនៅក្នុងខែកញ្ញា ឆ្នាំ២០២២ បន្ទាប់ពីទុនបម្រុងរូបិយប័ណ្ណបរទេសរបស់ខ្លួនឈានដល់កម្រិតទាបបំផុត ហើយបានបង្ខំឲ្យប្រទេសកោះនេះខកខានសងបំណុលបរទេសរបស់ខ្លួនជាលើកដំបូង។

គួរបញ្ជាក់ដែរថា បើយោងតាមទិន្នន័យចុងក្រោយរបស់ក្រសួងហិរញ្ញវត្ថុ បានឲ្យដឹងថា ស្រីលង្កាដែលបំណុលខាងក្រៅសរុបរបស់ខ្លួន មានចំនួន ៣៧ពាន់លានដុល្លារ ក៏ត្រូវបញ្ចប់ផងដែរនូវកិច្ចព្រមព្រៀងជាមួយធនាគារអភិវឌ្ឍន៍ចិន ដើម្បីរៀបចំរចនាសម្ព័ន្ធបំណុលឡើងវិញចំនួន ២,២ពាន់លានដុល្លារ។

នៅពេលដែលដំណើរការរៀបចំរចនាសម្ព័ន្ធបំណុលទាំងមូលត្រូវបានបញ្ចប់ ប្រទេសស្រីលង្កាសង្ឃឹមថា បន្ទុកបំណុលរបស់ខ្លួន នឹងត្រូវបានកាត់បន្ថយចំនួន ១៦,៩ពាន់លានដុល្លារ។ ធនាគារកណ្តាល បានប៉ាន់ប្រមាណថា សេដ្ឋកិច្ចរបស់ស្រីលង្កា នឹងកើនឡើង ៣ភាគរយ នៅឆ្នាំ២០២៤ បន្ទាប់ពីបានធ្លាក់ចុះ ២,៣ភាគរយ កាលពីឆ្នាំមុន៕