គណបក្សការងារ (Labour Party) របស់ចក្រភពអង់គ្លេស គ្រោងនឹងដណ្តើមកាន់អំណាចជាមួយនឹងចំនួនអាសនៈច្រើនបំផុតក្នុងកំណត់ត្រានៅក្នុងការបោះឆ្នោតជាតិនៅថ្ងៃព្រហស្បតិ៍ (០៤ កក្កដា) ស្អែកនេះ នេះបើតាមការព្យាករដោយស្ថាប័នស្ទង់មតិ សឺវ៉េស៊ិន (Survation) បានបង្ហាញកាលពីថ្ងៃអង្គារ (០២ កក្កដា)។

ការស្ទង់មតិនោះបានបង្ហាញថា បក្សការងាររបស់លោក ឃា ស្តាមឺ (Keir Starmer) ឈ្នះ ៤៨៤ អាសនៈក្នុងចំណោម ៦៥០ អាសនៈនៅក្នុងសភា ច្រើនជាងចំនួន ៤១៨ អាសនៈដែលឈ្នះដោយអតីតមេដឹកនាំបក្ស លោក ថូនី ប្លែរ (Tony Blair) នៅក្នុងការឈ្នះលើសលប់ដ៏ល្បីល្បាញរបស់លោកក្នុងឆ្នាំ១៩៩៧ និងច្រើនបំផុតក្នុងប្រវត្តិសាស្ត្ររបស់បក្ស។

គណបក្សអភិរក្សនិយម ដែលបានកាន់អំណាចអស់រយៈពេល ១៤ ឆ្នាំចុងក្រោយនេះ ត្រូវបានគេព្យាករថានឹងឈ្នះត្រឹមតែ ៦៤ អាសនៈប៉ុណ្ណោះ ដែលជាចំនួនតិចបំផុតចាប់តាំងពីគណបក្សនេះត្រូវបានបង្កើតឡើងក្នុងឆ្នាំ១៨៣៤ មក។ គណបក្សស្តាំនិយម កំណែទម្រង់ចក្រភពអង់គ្លេស (Reform UK) ត្រូវបានគេព្យាករថានឹងទទួលបានប្រាំពីរអាសនៈ។

ការវិភាគស្ទង់មតិផ្សេងទៀតបានបង្ហាញពីតួលេខតិចជាងនេះនៃជ័យជំនះសម្រាប់បក្សការងារ ប៉ុន្តែគ្មានការស្ទង់មតិណាមួយបានបង្ហាញពីលទ្ធផលរួមខុសគ្នាខ្លាំងទេ។ នៅមុននោះ ការស្ទង់មតិជាប្រចាំដោយស្ថាប័ន រ៉េដហ្វីល (Redfield) និង វីលតុន ស្រ្តេថឺជីស (Wilton Strategies) ដែលបានវាស់វែងចំណែកនៃការបោះឆ្នោតទូទាំងប្រទេស បានបង្ហាញពីតួលេខក្រោមនោះបន្តិចនៅក្នុងការនាំមុខរបស់បក្សការងារ ប៉ុន្តែនៅតែធ្វើឱ្យគណបក្សនេះបន្តដំណើរឆ្ពោះទៅរកជ័យជម្នះយ៉ាងងាយស្រួល៕