រដ្ឋមន្ត្រីការបរទេសសហរដ្ឋអាមេរិក លោក Antony Blinken បានសន្យាបន្តគាំទ្ររដ្ឋាភិបាលប្រទេសហៃទី ដែលទើបបង្កើតថ្មី កាលពីថ្ងៃអង្គារ ក្នុងអំឡុងពេលនូវអ្វីដែលលោកបានចាត់ទុកថាជា «ពេលវេលាសំខាន់បំផុត» សម្រាប់ប្រទេសតំបន់សមុទ្រការ៉ាអ៊ីបមួយនេះ ខណៈប្រទេសនេះ ទប់ទល់ទៅនឹងវិបត្តិមនុស្សធម៌ដ៏ជ្រៅ ដែលបង្កឡើងដោយក្រុមជនអន្ធពាលប្រដាប់អាវុធ។

នាយករដ្ឋមន្ត្រីប្រទេសហៃទី លោក ហ្គារី ខន់នីល(Garry Conille) និងរដ្ឋមន្ត្រីការបរទេស លោក ដូមីនីក ឌូពុយ(Dominique Dupuy) បានជួបជាមួយ លោក Blinken នៅក្រសួងការបរទេស ក្នុងទីក្រុង Washington DC រយៈពេលពីរសប្តាហ៍បន្ទាប់ពីរដ្ឋបាលរបស់លោក Biden បាននិយាយថា ខ្លួននឹងផ្តល់ជំនួយជិត១១០លានដុល្លារសម្រាប់ផ្នែកសន្តិសុខ និងនគរបាល ដល់ប្រទេសហៃទី។

កាលពីពេលថ្មីៗនេះ មន្ត្រីនគរបាលប្រទេសកេនយ៉ាដែលត្រូវបានដាក់ពង្រាយ ដោយបានចាប់ផ្តើមល្បាតនៅក្នុងរដ្ឋធានី ព័រ អូប្រាំង ប្រទេសហៃទី ជាផ្នែកមួយនៃបេសកកម្មគាំទ្រដោយអង្គការសហប្រជាជាតិ ដើម្បីប្រយុទ្ធប្រឆាំងក្រុមជនអន្ធពាលប្រដាប់អាវុធ ដែលបានដណ្តើមយករដ្ឋធានី។

សហរដ្ឋអាមេរិក គឺជាអ្នកគាំទ្រផ្នែកហិរញ្ញវត្ថុចម្បង របស់កងកម្លាំងសន្តិសុខអន្តរជាតិ ដឹកនាំដោយប្រទេសកេនយ៉ា ដែលអង្គការសហប្រជាជាតិ បានផ្តល់សច្ចាប័នដែលត្រូវបានបញ្ជូនកងកម្លាំងទៅកាន់ប្រទេសហៃទី ដើម្បីជួយនគរបាលរបស់ប្រទេសនេះ។