​អ៊ុយ​ក្រែ​ន៖ អធិការបតី​អាល្លឺម៉ង់​លោកស្រី Angela Merkel បាន​និយាយ​ថា​ ទណ្ឌកម្ម​បន្ថែម​ទៀត​អាច​នឹង​ត្រូវ​ដាក់​លើ​រុស្ស៊ី​ ប្រសិនបើ​ប្រទេស​នេះ​ប្រើ​បំពង់​បង្ហូរ​ឧស្ម័ន​ដ៏​ចម្រូងចម្រាស​ប្រឆាំង​នឹង​អ៊ុយ​ក្រែ​ន​។​

​ក្នុង​ដំណើរ​ទស្សនកិច្ច​ចុងក្រោយ​របស់​លោក​ស្រី​ទៅកាន់​ទីក្រុង Kyiv​ មុន​ពេល​ចាកចេញ​ពី​តំណែង​លោកស្រី Merkel បាន​ប្រាប់​ប្រធានាធិបតី​អ៊ុយ​ក្រែ​ន​លោក Volodymyr Zelensky ថា​ លោក​ស្រី​យល់​ពី​កង្វល់​របស់​លោក​ចំពោះ​គម្រោង​បំពង់​បង្ហូរ​ឧស្ម័ន Nord Stream 2។ លោក Zelensky ជំទាស់​នឹង​គម្រោង​បំពង់​បង្ហូរ​ប្រេង​ ដែល​លោក​និយាយ​ថា​គំរាមកំហែង​ដល់​សន្តិសុខ​របស់​អ៊ុយ​ក្រែ​ន​។ បំពង់​បង្ហូរ​ឧស្ម័ន​នេះ​នឹង​រត់​នៅ​ក្រោម​សមុទ្រ​បាល់​ទិក និង​បង្កើន​ការនាំចេញ​ឧស្ម័ន​របស់​រុស្ស៊ី​ទ្វេដង​ទៅកាន់​ប្រទេស​អាល្លឺម៉ង់​។​ អ៊ុយ​ក្រែ​ន​បារម្ភ​ថា​បំពង់​បង្ហូរ​ឧស្ម័ន Nord Stream 2 ដែល​ដឹកនាំ​ដោយ​រុស្ស៊ី​នឹង​រឹត​បន្តឹង​ការ​ក្ដោបក្ដាប់​យ៉ាង​ណែន​របស់​ទីក្រុង​មូស្គូ ​លើ​ការ​ផ្គត់ផ្គង់​ថាមពល​ក្នុង​តំបន់ ​និង​ពង្រឹង​ឥទ្ធិពល​របស់​ខ្លួន​។

​ក្នុង​សន្និសីទ​សារព័ត៌មាន​រួមគ្នា​មួយ​កាលពី​ថ្ងៃអាទិត្យ ​លោក Zelensky ​បាន​ហៅ​គម្រោង​នេះ​ថា​ ជា​អាវុធ​ភូមិសាស្ត្រ​នយោបាយ​របស់​វិមាន​ក្រឹម​ឡាំង ដែល​លោក​បាន​និយាយ​ថា ​វា​នឹង​បង្ក​គ្រោះថ្នាក់​ដល់​អឺរ៉ុប​ទាំងអស់​។​ គួរ​រម្លឹក​ថា លោកស្រី​អធិការបតី​អាល្លឺម៉ង់ Angela Merkel បានធ្វើ​ដំណើរ​ទៅ​ទីក្រុង​មូស្គូ​កាលពី​ថ្ងៃ​សុក្រ​ ​ដើម្បី​ពិភាក្សា​បញ្ហា​នានា​ជាមួយ​ប្រធានាធិបតី​រុស្ស៊ីលោក Vladimir Putin​។ ​ដំណើរ​ទស្សនកិច្ច​នេះ​កើតឡើង​ ក្នុង​កំឡុង​ពេល​ដែល​មាន​ទំនាក់ទំនង​ធ្លាក់​ចុះ​ស្ទើរ​ដល់​បាត​រវាង​ប្រទេស​ទាំង២ ​ដែល​នៅតែ​បន្ត​ទទួលរង​នូវ​ភាព​តានតឹង​ជា​បន្តបន្ទាប់ ​ជុំវិញ​ការប្រព្រឹត្ត​របស់​ទីក្រុង​មូស្គូ​ចំពោះ​អ្នកនយោបាយ​ប្រឆាំង​គឺ​លោក Alexei Navalny និងការ​បំពារបំពានរបស់​ទីក្រុង​ក្រឹម​ឡាំងចំពោះ​ប្រទេស​អ៊ុយ​ក្រែ​ន​៕

អត្ថបទ៖ សុខមាន