ទីភ្នាក់ងារសារព័ត៌មានរដ្ឋរុស្ស៊ី RIA កាលពីថ្ងៃអង្គារ (ទី២ ខែកក្កដា) បានរាយការណ៍ថា កងនាវាចម្បាំងភាគខាងជើងរបស់រុស្ស៊ី បានទៅដល់ទីក្រុងកំពង់ផែ La Guaira របស់ប្រទេសវ៉េណេហ្ស៊ុយអេឡា។

ឧត្តមនាវីឯករបស់វ៉េណេហ្ស៊ុយអេឡា លោក Edward Centeno Mass បាននិយាយថា នាវាទាំងនោះ បានឈប់ចតនៅកំពង់ផែ La Guaira អំឡុងការធ្វើដំណើរកងនាវាទាំងនេះនៅតំបន់ការ៉ាអ៊ីប ដោយការធ្វើនាវាចរណ៍នេះ គឺដើម្បីបង្ហាញពី «មិត្តភាព សាមគ្គីភាព និងការគាំទ្រ» របស់រុស្ស៊ី សម្រាប់ប្រជាជនវ៉េណេហ្ស៊ុយអាឡា។

គួរបញ្ជាក់ដែរថា កាលពីខែមិថុនា នាវាមុជទឹកដើរដោយថាមពលនុយក្លេអ៊ែរ និងនាវាចម្បាំងរបស់កងទ័ពជើងទឹករុស្ស៊ី បានទៅដល់ទីក្រុង Havana ក្នុងអំឡុងពេលឈប់ចតសម្រាក ដែលទាំងសហរដ្ឋអាមេរិក និងគុយបា បាននិយាយថា មិនមែនតំណាងឲ្យការគំរាមកំហែងនោះទេ ប៉ុន្តែបានបន្ថែមថា ដំណើរទស្សនកិច្ចនេះ គឺជាការបង្ហាញកម្លាំងពីទីក្រុងមូស្គូ ចំពេលមានភាពតានតឹង ដោយសារសង្គ្រាមនៅប្រទេសអ៊ុយក្រែន។

ស្ថានទូតរុស្ស៊ីប្រចាំនៅវ៉េណេហ្ស៊ុយអេឡា បាននិយាយថា វត្តមាននៃកងនាវាចម្បាំង និងនាវាដឹកប្រេង នៅប្រទេសវ៉េណេហ្ស៊ុយអេឡានេះ គឺដើម្បីបង្ហាញពីចំណងដ៏រឹងមាំ រវាងប្រទេសទាំង២៕