នៅថ្ងៃពុធនេះ ប្រធានាធិបតីរុស្ស៊ីលោក Vladimir Putin បានជួបជាមួយប្រធានាធិបតីម៉ុងហ្គោលីលោក Ukhnaagiin Khurelsukh នៅទីក្រុង Astana ប្រទេសកាហ្សាក់ស្ថាន នៅក្រៅកិច្ចប្រជុំកំពូលអង្គការកិច្ចសហប្រតិបត្តិការសៀងហៃ(SCO) ។

លោក Putin និយាយថា ឆ្នាំនេះពួកយើងប្រារព្ធកាលវេលាដ៏សំខាន់ រយៈពេល ៨៥ឆ្នាំ ចាប់តាំងពីជ័យជំនះក្នុងសង្រ្គាមទន្លេ Khalkhin Gol លើក្រុមឈ្លានពានជប៉ុន ។ ទំនាក់ទំនងរវាងប្រទេសរបស់យើងត្រូវបានបង្កើតឡើង ដោយផ្អែកលើគ្រឹះដ៏រឹងនាំ និងវិជ្ជមាននៃកិច្ចសហប្រតិបត្តិការ និងមិត្តភាព អស់រយៈពេលជាច្រើនទសវត្សរ៍មកហើយ ។

 គេរំពឹងផងដែរថា លោក Putinនឹងជួបសំណេះសំណាលការងារជាមួយមេដឹកនាំចិនលោក Xi Jinping ប្រធានាធិបតីទួរគីលោក Tayyip Erdogan ក្រុមមេដឹកនាំមកពីអាស៊ែបៃហ្សង់ និងប៉ាគីស្ថាន មុនពេលចូលរួមពិធីលៀងសាយភោជន៍ រៀបចំឡើងដោយប្រធានាធិបតីកាហ្សាក់ស្ថានលោក Kassym-Jomart Tokayev ។

 ខណៈពេលនោះដែរ ឥណ្ឌា និយាយថា លោកនាយករដ្ឋមន្រ្តី Narendra Modi ដែលត្រូវបានគេរំពឹងថា នឹងមានវត្តមាននៅទីក្រុងម៉ូស្គូក្នុងខែនេះ ពុំបានចូលរួមនោះទេ ។ លោក Modi បានបញ្ជូនរដ្ឋមន្រ្តីការបរទេសឥណ្ឌាលោក Subrahmanyam Jaishankar ឲ្យចូលរួមជំនួសរូបលោក ៕