ឪពុកម្តាយ និងអ្នកអប់រំច្រើនឡើងៗ នៅចក្រភពអង់គ្លេស កំពុងជំរុញឲ្យដាក់កំហិតដល់កុមារតូចៗ កុំឲ្យមានលទ្ធភាពប្រើប្រាស់ស្មាតហ្វូន (ទូរសព្ទដៃ) ចំពេលមានការព្រួយបារម្ភអំពីការគំរាមកំហែងតាមអ៊ីនធឺណិត មាតិកាមិនសមរម្យ និងសុខភាពផ្លូវចិត្ត។

ជាមួយគ្នានេះ អ្នកសង្កេតការណ៍បានលើកឡើងថា ក៏មានការភ័យខ្លាចផងដែរថា ការញៀនស្មាតហ្វូនអាចប៉ះពាល់ដល់សមត្ថភាព ក្នុងការទាក់ទង និងការផ្តោតអារម្មណ៍របស់ពួកគេ នាពេលអនាគត។

ក្ដីកង្វល់នេះកើតឡើងនៅពេលដែលជិត ១ភាគ៤នៃក្មេងអាយុចន្លោះពី ៥ទៅ ៧ឆ្នាំ នៅចក្រភពអង់គ្លេស ឥឡូវនេះ មានស្មាតហ្វូនកាន់។ នេះបើយោងតាមនិយតករទូរគមនាគមន៍ OFCOM។

OFCOM បានរកឃើញថា កុមារ ១ភាគ៣ ក្នុងក្រុមអាយុនេះ ប្រើប្រាស់បណ្ដាញសង្គមដែលគ្មានការត្រួតពិនិត្យ។ ចំនួនកើនឡើងនោះ ក៏មានប្រវត្តិរូបផ្ទាល់ខ្លួនរបស់ពួកគេ នៅលើវេទិកាបណ្ដាញសង្គម ទោះបីជាពួកគេនៅក្មេងពេកក៏ដោយ។

រដ្ឋាភិបាលចក្រភពអង់គ្លេស ត្រូវបានរាយការណ៍ថា កំពុងពិចារណាហាមឃាត់កុំឲ្យលក់ស្មាតហ្វូនដល់កុមារ ដែលមានអាយុក្រោម ១៦ឆ្នាំ។ អ្នកនាំពាក្យវិមាន Downing Street បានបដិសេធមិនធ្វើអត្ថាធិប្បាយអ្វីឡើយ ប៉ុន្តែបានកត់សម្គាល់ថា រដ្ឋាភិបាលថ្មីៗនេះ បានគាំទ្រគ្រូបង្រៀនដែលហាមប្រាមការប្រើប្រាស់ទូរសព្ទ អំឡុងថ្ងៃសិក្សា៕