ភ្លើងឆេះព្រៃ Thompson ដែលបានឆាបឆេះកាលពីព្រឹកថ្ងៃអង្គារ បានរីករាលដាលយ៉ាងឆាប់រហ័សនៅទូទាំងតំបន់ភាគខាងជើងរដ្ឋ California សហរដ្ឋអាមេរិក ដោយលេបត្របាក់ដៃព្រៃជាង ៨០០ហិចតា ។

ជាមួយនឹងស្ថានភាពអាកាសធាតុស្ងួត និងខ្យល់បក់ខ្លាំង ភ្លើងឆេះព្រៃនេះ បានបង្ខំឲ្យអ្នកស្រុករាប់ម៉ឺននាក់ ជម្លៀសខ្លួនចេញពីទីក្រុងជាច្រើន ។

លោក Dan Collins គឺជាកាពីទែនក្រុមភ្នាក់ងារពន្លត់អគ្គិភ័យស្រុក Butte បញ្ជាក់នៅលើបណ្តាញព័ត៌មានសង្គម X ថា ដំបូងឡើយភ្លើងឆេះព្រៃនេះ បានឆាបឆេះនៅតំបន់មានពលរដ្ឋរស់នៅតិច ប៉ុន្តែចាប់តាំងពីពេលនោះមក វាបានរីករាលដាលដល់ទីក្រុង Oroville ដែលមានពលរដ្ឋរស់នៅប្រហែល ២ម៉ឺននាក់ ។

បទបញ្ជាជម្លៀសខ្លួន ត្រូវបានបង្កើនពេញមួយថ្ងៃ ពេលដែលគ្រោះថ្នាក់ភ្លើងឆេះព្រៃ បន្តកើនឡើង ធ្វើឲ្យប៉ះពាល់ដល់អ្នកស្រុកនៅសហគមន៍ East Oroville និងសហគមន៍ជាច្រើនទៀត ។

ក្រុមភ្នាក់ងារពន្លត់អគ្គិភ័យមកពីទូទាំងរដ្ឋ California ត្រូវបានដាក់ពង្រាយ ដើម្បីព្យាយាមពន្លត់ភ្លើងឆេះព្រៃ ដែលបន្តគំរាមកំហែងដល់លំនៅដ្ឋានប្រជាពលរដ្ឋ អគារធុរកិច្ច និងហេដ្ឋារចនាសម្ព័ន្ធសំខាន់ៗជាច្រើនទៀត ។

ដោយឡែក មូលហេតុបណ្តាលឲ្យភ្លើងឆេះព្រៃនេះ កើតឡើង កំពុងស្ថិតក្រោមការស៊ើបអង្កេត ស្របពេលដែលក្រុមអាជ្ញាធរ ជំរុញឲ្យអ្នកស្រុក អនុវត្តតាមបទបញ្ជាជម្លៀសខ្លួន និងបន្តជូនដំណឹងតាមរយៈប៉ុស្តិ៍ផ្លូវការ ៕