រដ្ឋមន្ត្រីមហាផ្ទៃទួរគី លោក Ali Yerlikaya បាននិយាយកាលពីថ្ងៃអង្គារថា នគរបាលទួរគី បានឃាត់ខ្លួនជនសង្ស័យចំនួន ៤៧៤ នាក់បន្ថែមទៀត កាលពីល្ងាចថ្ងៃចន្ទជុំវិញ «ការតវ៉ាបង្កហេតុ» ប្រឆាំងនឹងជនភៀសខ្លួនស៊ីរី នៅទូទាំងប្រទេសទួរគី។

លោក Yerlikaya បាននិយាយថា៖«សកម្មភាពបង្កហេតុ ត្រូវបានរៀបចំឡើង»ប្រឆាំងនឹងជនជាតិស៊ីរីកាលពីយប់ថ្ងៃចន្ទ នៅក្នុងទីក្រុងមួយចំនួនទូទាំងប្រទេស បន្ទាប់ពីក្មេងស្រីជនជាតិស៊ីរីម្នាក់ ត្រូវបានបៀតបៀន ដោយបុរសជនជាតិស៊ីរី នៅក្នុងខេត្ត Kayseri ភាគកណ្តាលរបស់ប្រទេសទួរគី កាលពីថ្ងៃទី ៣០ ខែមិថុនា។

រដ្ឋមន្ត្រីទួរគីរូបនេះ បានបញ្ជាក់នៅលើវេទិកាប្រព័ន្ធផ្សព្វផ្សាយសង្គម X ថា៖«អ្នកជាប់ឃុំចំនួន ២៨៥ នាក់ មានកំណត់ត្រាព្រហ្មទណ្ឌពីមុនសម្រាប់បទល្មើសដូចជា គ្រឿងញៀន លួច លួច បង្កឲ្យខូចខាតទ្រព្យសម្បត្តិ និងការបៀតបៀនផ្លូវភេទ»។

កុបកម្មប្រឆាំងស៊ីរី បានចាប់ផ្តើមដំបូង នៅក្នុងខេត្ត Kayseri ជាកន្លែងដែលអ្នកស្រុក កាលពីថ្ងៃអាទិត្យបានដុតផ្ទះសម្បែង និងអាជីវកម្ម ដែលជាកម្មសិទ្ធិរបស់ជនជាតិស៊ីរី ហើយបានបំផ្លិចបំផ្លាញយានជំនិះ របស់ពួកគេ។

អំពើហិង្សានោះ បានរីករាលដាលដល់ខេត្ត Hatay, Kilis, Gaziantep, Konya និង Antalya ខណៈដែលរដ្ឋាភិបាលទួរគី បាននិងកំពុងអំពាវនាវឲ្យមានភាពស្ងប់ស្ងាត់។