ក្រុមហ៊ុនផលិតដែកថែបដ៏ធំរបស់ប្រទេសជប៉ុន គឺ Nippon Steel និងក្រុមហ៊ុនពាណិជ្ជកម្ម Sumitomo Corp នៅថ្ងៃពុធ (ទី៣ ខែកក្កដា) នេះ បានប្រាប់ឲ្យដឹងថា ពួកគេបានបន្តកិច្ចសន្យារយៈពេលវែងជាមួយក្រុមហ៊ុន Equinor របស់ប្រទេសន័រវ៉ែស ដើម្បីផ្គត់ផ្គង់បំពង់ដែកគ្មានថ្នេរ រយៈពេលរហូតដល់ទៅ ៩ឆ្នាំ។

បំពង់ដែលត្រូវផ្គត់ផ្គង់នោះ នឹងត្រូវបានយកទៅប្រើក្នុងការអភិវឌ្ឍប្រេង និងឧស្ម័ន ព្រមទាំងជាកន្លែងចាប់យកកាបូន (CCS) ក្នុងប្រទេសន័រវ៉ែស និងទីតាំងផ្សេងទៀត។

គួរបញ្ជាក់ថា អស់រយៈពេល ៣៥ឆ្នាំកន្លងមកនេះ បណ្ដាក្រុមហ៊ុនជប៉ុន បាន និងកំពុងផ្តល់ផលិតផលបំពង់ដែលត្រូវបានគេស្គាល់ថា ជាទំនិញបំពង់សម្រាប់ប្រទេសផលិតប្រេង (OCTG) ដល់ក្រុមហ៊ុនថាមពលន័រវ៉ែស សម្រាប់ការផលិតប្រេង និងឧស្ម័ន។

ជាមួយគ្នានេះ ក្រុមហ៊ុន Nippon Steel និង Sumitomo គ្រោងនឹងពង្រីកបន្ថែមនូវកិច្ចសហប្រតិបត្តិការរយៈពេលវែងជាមួយក្រុមហ៊ុន Equinor ក្នុងវិស័យថាមពល។ នេះបើយោងតាមសេចក្តីថ្លែងការណ៍ដាច់ដោយឡែកពីក្រុមហ៊ុនជប៉ុនទាំង២។

ការសម្រេចនេះធ្វើឡើងបន្ទាប់ពីក្រុមហ៊ុន Nippon Steel និង Sumitomo ទទួលបានការបញ្ជាទិញពីក្រុមហ៊ុន QatarEnergy នៅក្នុងខែមិថុនា សម្រាប់បំពង់គ្មានថ្នេរមានលោហធាតុខ្ពស់ ដើម្បីប្រើជាកន្លែងចាប់យកកាបូន (CCS)៕