មន្ត្រីជំនួយជាន់ខ្ពស់របស់អង្គការសហប្រជាជាតិ បាននិយាយកាលពីថ្ងៃពុធ (០៣ កក្កដា) ថា បញ្ជាជម្លៀសយោធាអ៊ីស្រាអែល ដែលគ្របដណ្តប់មួយភាគបីនៃតំបន់ហ្កាហ្សាស្ទ្រីប «បានបំផ្លាញ» កិច្ចខិតខំប្រឹងប្រែងរបស់អង្គការសហប្រជាជាតិ ក្នុងការកែលម្អការផ្តល់ជំនួយមនុស្សធម៌តាមរយៈច្រកឆ្លងកាត់ កេរឹម ស្ហាលូម (Kerem Shalom)។

អ៊ីស្រាអែល បានរិះគន់ប្រតិបត្តិការជំនួយដែលដឹកនាំដោយអង្គការសហប្រជាជាតិ នៅក្នុងតំបន់ហ៊ុមព័ទ្ធមានប្រជាជន ២,៣ លាននាក់នេះថាគ្មានប្រសិទ្ធភាព ប៉ុន្តែអង្គការសហប្រជាជាតិនិយាយថា ការចែកចាយមិនត្រឹមតែត្រូវបានរារាំងដោយសង្រ្គាមរយៈពេលជិតប្រាំបួនខែរវាងអ៊ីស្រាអែល និងពួកសកម្មប្រយុទ្ធប៉ាឡេស្ទីនហាម៉ាស ប៉ុណ្ណោះទេ ថែមទាំងដោយសារភាពគ្មានច្បាប់ទៀតផង។

លោក អាន់ឌ្រា ដឺ ដូមីនីកូ (Andrea De Domenico) ប្រធានការិយាល័យសម្របសម្រួលកិច្ចការមនុស្សធម៌ នៃអង្គការសហប្រជាជាតិ នៅក្នុងតំបន់កាន់កាប់ប៉ាឡេស្ទីន បាននិយាយថា ក្នុងរយៈពេលប៉ុន្មានសប្តាហ៍កន្លងមកនេះ មានកិច្ចពិភាក្សាជាច្រើនជាមួយអ៊ីស្រាអែលអំពីរបៀបកែលម្អស្ថានភាព ប៉ុន្តែការបញ្ជាជម្លៀសនេះ ធ្វើឱ្យការខិតខំទាំងអស់នេះត្រូវបានបំផ្លាញ។

យោធាអ៊ីស្រាអែលបានប្រកាសក្នុងខែនេះនូវការផ្អាកប្រយុទ្ធជារៀងរាល់ថ្ងៃដើម្បីជួយសម្រួលដល់ការប្រមូលជំនួយពីច្រក កេរឹម ស្ហាលូម ប៉ុន្តែអង្គការសហប្រជាជាតិបាននិយាយថា ភាពគ្មានច្បាប់នៅហ្កាហ្សា មានន័យថាស្ថានភាពនៅតែគ្រោះថ្នាក់ខ្លាំង ហើយនោះជាទំនួលខុសត្រូវរបស់អ៊ីស្រាអែល ក្នុងការស្តារសណ្តាប់ធ្នាប់ និងសុវត្ថិភាពសាធារណៈនៅតំបន់ហែកហួរដោយសង្គ្រាមមួយនេះ៕