ប្រទេសអ៊ីស្រាអែល បានអនុម័តការរឹបអូសយកដីធំបំផុតរបស់ខ្លួននៅតំបន់កាន់កាប់ West Bank ក្នុងរយៈពេលជាង៣ទសវត្សរ៍មកនេះ ជាចំណាត់ការមួយដែលត្រូវបានរិះគន់ដោយក្រុមសកម្មជនកាលពីថ្ងៃពុធ ថា ជាការធ្វើឲ្យប៉ះពាល់ដល់ក្តីសង្ឃឹមសន្តិភាពរបស់ប៉ាឡេស្ទីន។

យោងតាមសេចក្តីប្រកាសជាផ្លូវការ ដែលទទួលបានដោយសារព័ត៌មាន AFP បន្ទាប់ពីត្រូវបានបង្ហាញដោយក្រុម Peace Now បានឲ្យដឹងថា ផ្ទៃដីទំហំ ១២,៧ គីឡូម៉ែត្រក្រឡានៅជ្រលងភ្នំហ្សកដានី ត្រូវបានប្រកាសជាផ្លូវការថាជា «សម្បត្តិរដ្ឋ» កាលពីខែមិថុនា។

ក្រុម Peace Now បាននិយាយថា ទំហំនៃតំបន់ដែលបានកំណត់សម្រាប់ការប្រកាសគឺធំបំផុត ចាប់តាំងពីកិច្ចព្រមព្រៀងទីក្រុង Oslo ឆ្នាំ១៩៩៣ ហើយឆ្នាំ២០២៤ កំណត់នូវចំណុចខ្ពស់ក្នុងវិសាលភាពនៃសេចក្តីប្រកាសដីរដ្ឋ។ រដ្ឋាភិបាលអ៊ីស្រាអែល បានរឹបអូសយកផ្ទៃដីសរុប ២៣,៧ គីឡូម៉ែត្រក្រឡា នៅតំបន់ West Bank ចាប់តាំងពីដើមឆ្នាំមក។

ក្រុម Peace Now បាននិយាយថា នៅពេលដែលដីត្រូវបានប្រកាសថាជា «សម្បត្តិរដ្ឋ» ពលរដ្ឋប៉ាឡេស្ទីន បានបាត់បង់សិទ្ធិនៃកម្មសិទ្ធិឯកជន ហើយត្រូវបានរារាំងមិនឲ្យប្រើប្រាស់ដីនោះ។

អ៊ីស្រាអែល បានដណ្តើមយកតំបន់ West Bank ទីក្រុងក្រុងហ្សេរុយសាឡឹមខាងកើត និងតំបន់ហ្កាហ្សាស្ទ្រីប ក្នុងសង្រ្គាមអារ៉ាប់-អ៊ីស្រាអែល ឆ្នាំ១៩៦៧។ ចាប់តាំងពីពេលនោះមក អ៊ីស្រាអែល បានសាងសង់ការតាំងទីលំនៅរាប់សិបកន្លែងនៅទូទាំងតំបន់ West Bank ផ្តល់លំនៅឋានដល់ជនជាតិអ៊ីស្រាអែលជាង ៤៩០.០០០នាក់ ដែលត្រូវបានចាត់ទុកថាខុសច្បាប់ក្រោមច្បាប់អន្តរជាតិ។

ពលរដ្ឋប៉ាឡេស្ទីន ប្រហែលបីលាននាក់រស់នៅក្នុងតំបន់ West Bank ។