វាយកូនឃ្លីលើតុ៖ សហព័ន្ធកីឡាវាយកូនឃ្លីលើតុកម្ពុជាបានទទួលសម្ភារៈកីឡា ដែលជាជំនួយឧបត្ថម្ភរបស់សហព័ន្ធកីឡាវាយកូនឃ្លីលើតុអាស៊ី ដើម្បីបម្រើឲ្យការត្រៀមប្រមូលផ្ដុំហ្វឹកហាត់លក្ខណៈបិទខ្ទប់នាពេលឆាប់ៗខាងមុខ។ នេះបើតាមការបញ្ជាក់របស់លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា។
អគ្គលេខាធិការសហព័ន្ធដដែលបន្ដថា បន្ទាប់ពីសម្ភារៈហ្វឹកហាត់ដល់មកដល់កម្ពុជា សហព័ន្ធបានបញ្ជូនទៅសាលកីឡាវាយកូនឃ្លីលើតុនៅពហុកីឡដ្ឋានជាតិមរតកតេជោភ្លាម ដើម្បីត្រៀមរៀបចំកន្លែងប្រមូលផ្ដុំហ្វឹកហាត់លក្ខណៈបិទខ្ទប់នាពេលឆាប់ៗខាងមុខ បន្ទាប់ពីទទួលបានការអនុញ្ញាតពីក្រសួងអប់រំ យុវជន និងកីឡា និងគណៈកម្មាធិការជាតិ CAMSOC ដើម្បីសម្រួចសមត្ថភាពកីឡាករ-កីឡាការិនីត្រៀមស៊ីហ្គេម។ ចំពោះសម្ភារៈដែលជាជំនួយរបស់សហព័ន្ធកីឡាវាយកូនឃ្លីលើតុអាស៊ីនេះមានចំនួន ៩ប្រភេទដែលមានតម្លៃសរុបជាង ៥,០០០ដុល្លារ ហើយការទទួលបាននូវសម្ភារៈហ្វឹកហាត់ថ្មីៗបន្ថែមនេះ លោករំពឹងថា ក្រុមកីឡាករ-កីឡាការិនីដែលគ្រោងប្រមូលផ្ដុំបិទខ្ទប់នាពេលឆាប់ៗខាងមុខ នឹងទទួលបានឧបករណ៍ហ្វឹកហាត់គ្រប់គ្រាន់ដើម្បីសម្រួចបច្ចេកទេស ឆ្ពោះទៅប្រកួតប្រជែងស៊ីហ្គេមចំពោះមុខ ពិសេសស៊ីហ្គេមឆ្នាំ២០២៣ នៅកម្ពុជា។
លោក ស៊ុន សុទ្ធារិទ្ធ បានបន្ថែមថា គោលដៅចំពោះមុខក្រៅពីការប្រមូលផ្ដុំបិទខ្ទប់នៅពហុកីឡដ្ឋានជាតិមរតកតេជោ តាមរយៈគោលការណ៍របស់គណៈកម្មាធិការជាតិ CAMSOC សហព័ន្ធក៏គ្រោងបញ្ជូនកីឡាករ-កីឡាការិនីមួយចំនួនទៅហ្វឹកហាត់នៅចិន ជាមួយសហព័ន្ធ ១១ប្រភេទកីឡាទៀតក្រោយជំនួយឥតសំណងរបស់រដ្ឋាភិបាលចិន ដើម្បីសម្រួចសមត្ថភាព និងបច្ចេកទេសបន្ថែមក្នុងដំណើរឆ្ពោះទៅស៊ីហ្គេមលើកទី៣១ នៅវៀតណាម និងស៊ីហ្គេមលើកទី៣២ នៅកម្ពុជាផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
