អាមេរិក៖ យោធាអាមេរិកកំពុងផ្តល់ការប្រឹក្សាដល់ប្រធានាធិបតី Joe Biden ថា លោកត្រូវតែសម្រេចចិត្តនៅថ្ងៃអង្គារនេះថា តើត្រូវពន្យារពេលការជម្លៀសប្រជាជននៅអាហ្វហ្គានីស្ថាន ឱ្យហួសពីពេលវេលាដែលបានកំណត់ថ្ងៃទី៣១ ខែសីហា ឬយ៉ាងណា នេះបើយោងតាមមន្ត្រីការពារជាតិដែលដឹងច្បាស់ពីការពិភាក្សានេះ ទោះបីជាលោក Biden មិនទាន់សម្រេចចិត្តច្បាស់ក៏ដោយ។
ក្រុមទីប្រឹក្សាយោធាបានប្រាប់សេតវិមានថា ការសម្រេចចិត្តត្រូវតែធ្វើឡើងនៅថ្ងៃអង្គារនេះ ដើម្បីមានពេលវេលាគ្រប់គ្រាន់ដកកងទ័ពចំនួន ៥.៨០០នាក់ដែលបច្ចុប្បន្នកំពុងស្ថិតនៅលើទឹកដីនោះ ក៏ដូចជាឧបករណ៍ និងអាវុធរបស់ពួកគេ។ ប្រសិនបើប្រធានាធិបតីយល់ព្រមនោះ យោធារំពឹងថានឹងមានពេលវេលា “ពីរបីថ្ងៃទៀត” នៃការព្យាយាមជម្លៀសប្រជាជនឱ្យបានច្រើនតាមដែលអាចធ្វើទៅបាន មុនពេលការដកទ័ពអាមេរិកចាប់ផ្តើមដែលអាចធ្វើទៅបាននៅចុងសប្ដាហ៍នេះ។ ទូរទស្សន៍ CNN បានឲ្យដឹងថា គិតត្រឹមថ្ងៃចន្ទដើមសប្ដាហ៍នេះ លោក Biden នៅតែសម្រេចចិត្តថា តើត្រូវពន្យារពេលកំណត់សម្រាប់ការដកកងទ័ពអាមេរិកទាំងអស់ ឬអត់។
ទីប្រឹក្សារបស់ប្រធានាធិបតីមួយចំនួន បានផ្ដល់គំនិតប្រឆាំងនឹងការពន្យារពេល ដោយលើកឡើងពីស្ថានភាពសន្តិសុខនៅក្នុងទឹកដីអាហ្វហ្គានីស្ថាន។.ក្រុមមន្ត្រីបានចំណាយពេលប៉ុន្មានថ្ងៃចុងក្រោយនេះ ដើម្បីត្រួតពិនិត្យការគំរាមកំហែងភេរវកម្មដោយសំអាងលើ “ភាពឋិតថេរ” និងព័ត៌មានគួរឱ្យជឿជាក់ថា ស្ថានការណ៍វឹកវរនៅខាងក្រៅអាកាសយានដ្ឋានបានបង្កើតគោលដៅ សម្រាប់ក្រុមអាយស៊ីសនៅអ៊ីរ៉ាក់ និងអង្គការដទៃទៀត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
