ទីភ្នាក់ងារជនភៀសខ្លួនរបស់អង្គការសហប្រជាជាតិ បាននិយាយថា យុទ្ធភណ្ឌមិនទាន់ផ្ទុះ បង្កការគំរាមកំហែងដ៏ធំដល់ប្រជាជននៅតំបន់ហ្កាហ្សាស្ទ្រីប នៅពេលមនុស្សកាន់តែច្រើនត្រឡប់ទៅតំបន់ដែលត្រូវបានទម្លាក់គ្រាប់បែក ឬតំបន់មានការប្រយុទ្ធគ្នាខ្លាំង។

ទីភ្នាក់ងារជំនួយនិងការងារសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ារបស់អង្គការសហប្រជាជាតិ (UNRWA) បាននិយាយនៅក្នុងសារបង្ហោះនៅលើវេទិកាប្រព័ន្ធផ្សព្វផ្សាយសង្គម X ថា កុមារបានរើកកាយនៅតាមកម្ទេចកម្ទីថ្ម ប្រឈមទៅនឹងហានិភ័យដ៏គួរឱ្យព្រួយបារម្ភជារៀងរាល់ថ្ងៃ ដូច្នេះគ្មានកន្លែងណាមានសុវត្ថិភាពទេ នៅក្នុងតំបន់ហ្កាហ្សា។

យោងតាមអង្គភាពសេវាសកម្មភាពកំចាត់មីនរបស់អង្គការសហប្រជាជាតិ បានឲ្យដឹងថា កម្ទេចកម្ទីជាង ៣៧លានតោន នៅតំបន់ហ្កាហ្សាស្ទ្រីប មានផ្ទុកសារធាតុមិនឆេះ(អាសបេស្តូស) សារធាតុចម្លងរោគផ្សេងទៀត និងយុទ្ធភណ្ឌមិនទាន់ផ្ទុះ ប្រហែល ៨០០.០០០តោន។ យ៉ាងហោចណាស់១០ភាគរយនៃគ្រាប់រំសេវ ដែលបានបាញ់ ពុំបានផ្ទុះ។

អ៊ីស្រាអែល បាននិងកំពុងបើកការវាយលុកទ្រង់ទ្រាយធំប្រឆាំងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកប្រឆាំងការវាយលុករបស់ក្រុមហាម៉ាសឆ្លងព្រំដែនភាគខាងត្បូងអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ដែលក្នុងអំឡុងពេលនោះ មនុស្សប្រហែល១.២០០នាក់បានស្លាប់ និងជាង ២០០នាក់ ត្រូវបានចាប់ជាចំណាប់ថ្នូរ។