គិតមកដល់ពេលនេះ ប្រមុខរាជរដ្ឋាភិបាលកម្ពុជានៅតែបន្តយកចិត្តទុកដាក់ ចំពោះការ​បើក​ផ្តល់​ប្រាក់​ឧបត្ថម្ភ​បន្ថែមជូនដល់ស្រ្តីមុន ក្រោយ និងពេលសម្រាលរួច។ ទន្ទឹមនេះ កម្មការិនីបម្រើ​ការងារ​ក្នុង​វិស័យឧស្សាហកម្មកាត់ដេរ បានបង្ហាញទឹកមុខសប្បាយរីករាយ និង​សម្តែង​ការ​អរគុណ​ជូន​ចំពោះ​ថ្នាក់ដឹកនាំ និងសំណាក់ក្រុមគ្រូពេទ្យ ដែលបានយកចិត្តទុកដាក់ ដោយមិន​រើស​អើង​វណ្ណៈ​។

ជួបសម្ភាសន៍ផ្ទាល់ជាមួយកម្មការិនីមានផ្ទៃពោះ និងស្រ្តីក្រោយសម្រាលកូនរួច នៅមជ្ឈ​មណ្ឌល​ជាតិ​គាំពារមាតា និងទារកនៅព្រឹកថ្ងៃទី៤ កក្កដា ឆ្នាំ២០២៤នេះ ពួកគាត់បានឲ្យព័ត៌មាន ប៊ីធីវី ដឹង​ស្រដៀងគ្នាថា តាមរយៈបណ្ណ ប.ស.ស. ក្នុងអំឡុង មុន ក្រោយ ពេលសម្រាលកូន ពួក​គាត់​មិន​ដែល​អស់ថ្លៃចំណាយក្នុងការប្រើប្រាស់របបផ្នែកថែទាំសុខភាពនេះទេ។ បន្ថែមពីនេះទៀត ក្រៅ​ពី​ទទួលបានប្រាក់ឧបត្ថម្ភបន្ថែម រាល់ថ្លៃចំណាយនានាក្នុងពេលឆ្លងទន្លេ ក៏មិនអស់ថ្លៃផងដែរ ដោយ​សារ​ពួកគាត់មានកាតសមាជិកបេឡាជាតិរបបសន្តិសុខសង្គម (ប័ណ្ណប.ស.ស) ។ ពួក​គាត់​អះ​អាង​បន្ថែមថា លើសពីនេះទៀត គឺមាន​ការ​យក​ចិត្ត​ទុក​ដាក់​ខ្ពស់​ពី​សំណាក់​ក្រុម​គ្រូ​ពេទ្យ​គ្រប់​មជ្ឈ​ដ្ឋាន​ផង​ដែរ​។

អ្នកស្រី ហែម សុខលាភ ជាកម្មការិនីរោងចក្រដេរស្បែកជើង មកពីខេត្តកំពង់ឆ្នាំង ដែល​ទើប​សម្រាល​កូន​បាន​ប្រមាណជិត១សប្តាហ៍ បានប្រាប់ ប៊ីធីវី ដោយបង្ហាញការពេញចិត្តថា អ្នកស្រី ក៏​ដូច​ជា​កម្មការនីដទៃផ្សេងទៀត ទទួលបានអត្ថប្រយោជន៍ចាស់ និងអត្ថប្រយោជន៍​បន្ថែម​ក្នុង​ការ​ពិនិត្យ​ផ្ទៃ​ពោះអំឡុងពេលសម្រាល និងក្រោយសម្រាល។ អ្នកស្រី បានឲ្យដឹងទៀតថា ក្នុង​អំឡុង​ពេល​នេះ មិនត្រឹមតែមិនចំណាយថវិកា ថែមទាំងទទួលបានប្រាក់ឧបត្ថម្ភថែមទៀត ដែលអ​ត្ថ​ប្រយោជន៍​ទាំងអស់នេះ បានជួយ​សម្រួល​យ៉ាង​ច្រើន​ក្នុង​ការ​កាត់​បន្ថយ​ចំណាយ​ក្នុង​គ្រួសា​រ​មួយ​កម្រិត​ផង​ដែរ។

យោងតាម ឯកឧត្តម ហេង សុផាន់ណារិទ្ធ អគ្គនាយករង បេឡាជាតិសន្តិសុខសង្គម នៃ​ក្រសួង​ការងារ និងបណ្តុះបណ្តាលវិជ្ជាជីវៈ បានឲ្យដឹងថា គិតក្នុងរយៈពេល ៦ខែ ឆ្នាំ២០២៤នេះ បេឡា​ជាតិ​សន្តិសុខសង្គម បានបើកផ្តល់ប្រាក់ឧបត្ថម្ភរបស់រាជរដ្ឋាភិបាល មុន ក្រោយ ពេលសម្រាល និង​ចាក់វ៉ាក់សាំងកូនដល់ស្រ្តី សរុបចំនួនជាង ៨ម៉ឺន ៧ពាន់នាក់ ចំនួនកូនជាង ៨ម៉ឺន ៤ពាន់នាក់ សរុប​ជា​ថវិកាចំនួនជាង ៥០ពាន់ ៤២២លានរៀល ឬស្មើនឹងប្រមាណជាង ១២​លាន​ដុល្លារ​អាម៉េរិក​៕ អត្ថបទ ឈិត បូរ៉ាវី