អ្នកនាំពាក្យក្រសួងយុត្តិធម៌ អះអាងថា ការចោទប្រកាន់ពីការអនុវត្តច្បាប់លើក្រុមសកម្មជនបរិស្ថានដែលសាលាដំបូងរាជធានីភ្នំពេញទើបប្រកាសសាលក្រមពាក់ព័ន្ធនឹងការប្រមាថអង្គព្រះមហាក្សត្រជាលេសបិទបាំងកំហុសតែប៉ុណ្ណោះ។

ឆ្លើតតបទៅនឹង សហភាពអឺរ៉ុបប្រចាំកម្ពុជា ស្ថានទូតបរទេស និងអង្គការមិនមែនរដ្ឋាភិបាលមួយចំនួន បានចេញសេចក្តីថ្លែងការណ៍សម្តែងការព្រួយបារម្មណ៍លើការសម្រេចផ្តន្ទាទោសក្រុមសកម្មជនបរិស្ថានកាលពីថ្មីៗនេះ ឯកឧត្តម ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានប្រាប់ BTV ឱ្យដឹងនៅថ្ងៃទី៤ ខែកក្កដា ឆ្នាំ២០២៤ថា មុនឈានដល់ការសម្រេចរបស់សាលាដំបូងរាជធានីភ្នំពេញក្នុងការផ្តន្ទាទោសលើជនជាប់ចោទនោះ គឺត្រូវផ្អែកលើអង្គហេតុ អង្គច្បាប់ ជាពិសេសភស្តុតាង និងការស៊ើបអង្កេតរបស់សមត្ថកិច្ចទើបឈានទៅដល់ការសម្រេចផ្តន្ទាទោស។ 

អ្នកនាំពាក្យក្រសួងយុត្តិធម៌ លើកឡើងថា ការចេញសេចក្តីថ្លែងការណ៍ចោទប្រកាន់ជុំវិញសំណុំរឿងផ្តន្ទាទោសក្រុមសកម្មជនបរិស្ថាននេះ គឺគ្រាន់តែជាលេស ដើម្បីបិទបាំងកំហុសពួកគេ ក៏ប៉ុន្តែនីតិវិធីផ្លូវច្បាប់មិនអាចជួយដល់ពួកគេបានទេ មានតែការចូលរួមក្នុងដំណើរការក្នុងនីតិវិធីរបស់តុលាការទើបជាមធ្យោបាយការពារជនជាប់ចោទ។

អ្នកនាំពាក្យរូបនេះ អះអាងថា ចំពោះសំណុំរឿងនេះ មានតែមធ្យោបាយតាមផ្លូវតែមួយគត់ជួយដល់ជនជាប់ចោទ គឺការចូលរួមក្នុងដំណើរការនីតិវិធីតុលាការ បង្ហាញភស្តុតាង សក្ខីកម្មឱ្យបានរឹងមាំក្នុងការដោះបន្ទុករួចពីបទចោទដែលសមត្ថកិច្ចមាន ឬបន្តប្តឹងទៅសាលាឧទ្ធរណ៍តែប៉ុណ្ណោះ។ 

សូមជម្រាបថា សាលាដំបូងរាជធានីភ្នំពេញកាលពីថ្ងៃទី២ ខែកក្កដា ឆ្នាំ២០២៤ បានប្រកាសសាលក្រមផ្តន្ទាទោសមេក្លោង និងសកម្មជនមាតាធម្មជាតិចំនួន ១០នាក់ ដាក់ពន្ធនាគារពី៦ឆ្នាំ ទៅ៨ឆ្នាំ និងពិន័យជាប្រាក់ចំនួន ១០លានរៀល ពាក់ព័ន្ធការប្រមាថអង្គព្រះមហាក្សត្រ និងរួមគំនិតក្បត់។ ការសម្រេចផ្តន្ទាទោសលើក្រុមសកម្មជនបរិស្ថាននេះ ដោយសារកាលពីឆ្នាំ២០២១ ក្រុមសកម្មជនមាតាធម្មជាតិ បានជាប់ចោទពីបទប្រមាថព្រះមហាក្សត្រ និងបទរួមគំនិតក្បត់ ក្រោយពីបែកធ្លាយវីដេអូកិច្ចប្រជុំមួយដែលពួកគេជជែកគ្នានាពេលនោះ៕ អត្ថបទ សេក ឧត្តម