​បាល់ទាត់៖ ​ក្រុមបាល់ទាត់​ហង្ស​ក្រហម Liverpool បាន​បដិសេធ​មិន​ឱ្យ​កីឡាករ​របស់​ខ្លួន​មួយ​ចំនួន ​ចាកចេញ​ទៅ​ជួយ​ក្រុម​ជំរើសជាតិ​ឡើយ​ក្នុង​ការ​ប្រកួត​ជំ​រុះ World Cup នៅ​ខែ​កញ្ញា​ខាងមុខនេះ​ដោយសារ​ការ​វិល​ត្រលប់​ត្រូវ​ធ្វើ​ច​ត្តា​ឡី​ស័ក​រយៈពេល​យូរ​។

​​ខ្សែប្រយុទ្ធ​អេហ្ស៊ីប Mohamed Salah ប្រហែលជា​មិន​អាច​ទៅ​ជួយ​ក្រុម​ជំរើសជាតិ​បាន ​ប្រសិនបើ​អាជ្ញាធរ​អង់គ្លេស​មិន​មាន​ការលើកលែង រឺ​បន្ធូរបន្ថយ​ការ​ធ្វើ​ច​ត្តា​ឡី​ស័ក​ពេល​ត្រលប់​មកវិញ​។ ​​អេហ្ស៊ីប​ជា​ប្រទេស​ដែល​ស្ថិត​ក្នុង​បញ្ជី​ក្រហម​របស់​អង់គ្លេស ដែល​មានន័យថា Salah នឹង​អវត្តមាន​យ៉ាងហោចណាស់ ២​ប្រកួត​ឱ្យ Liverpool នៅ​ពេល​ត្រលប់​មកវិញ​ពី​ទីក្រុង​គែរ​។​ ​​អេហ្ស៊ីប​នឹងត្រូវ​ជួប​ប្រកួត​ជាមួយ​អង់​ហ្គោ​ឡា​នៅ​ទីក្រុង​គែរ​ថ្ងៃទី២ ខែកញ្ញា​ខាងមុខ មុនពេល​ហោះហើរ​ទៅ​ជួប​ជាមួយ​ម្ចាស់ផ្ទះ​ហា្ក​បុ​ង ៣ថ្ងៃ​បន្ទាប់​។

​ជាមួយគ្នា​នោះដែរ កីឡាករ​ប្រេ​ស៊ី​ល​បីនាក់​របស់ Liverpool រួមមាន Fabinho, Roberto Firmino និង​អ្នកចាំទី Alisson Becker សុទ្ធតែ​ត្រូវបាន Liverpool ឃាត់ឃាំង​ផងដែរ​។​ ​ប្រេ​ស៊ី​ល​ដែល​ត្រូវ​ប្រកួត​ជំ​រុះ World Cup នៅ​តំបន់​អាមេរិក​ឡាទីន​ថ្ងៃទី​៣ ខែកញ្ញា​ខាងមុខនេះ​ក៏​ស្ថិត​ក្នុង​បញ្ជី​ក្រហម​ផងដែរ​របស់​អង់គ្លេស​៕

​អត្ថបទ​៖​នាង សុភា​វុ​ធ